Folklorys kūpa “Upīte” ceļu iz jaunū albumu turpynoj ar dzīsmi “Brigaders”

Folklorys kūpa “Upīte” ceļu iz jaunū albumu turpynoj ar dzīsmi “Brigaders”

Rokstu sagataveja: portals lakuga.lv

Portals lakuga.lv jau viesteja, ka folklorys kūpa “Upīte” suokuse apzynuot, īraksteit i vuiceitīs Upītis kulturtelpā i tai pīguļūšajā teritorejā kolhoza laikūs dzīduotuos dzīsmis. Daļa nu salaseitūs dzīšmu teik atjaunuotys, dūdūt tom jaunu, myusdīneigu skaniejumu i kotru mienesi 21. datumā vīnu nu tūs publicejūt. Janvarī folklorys kūpa “Upīte” klauseituojim pīduovoj dzīsmi “Brigaders”.

Kai informej Bolvu nūvoda Namaterialuos kulturys montuojuma centra “Upīte” direktors Andris Slišāns, folklorys kūpa “Upīte” ir salasejuse vaira par 100 kolhoza laikūs dzīduotu dzīšmu. Īplānuots vysmoz 10 dzīsmis atjaunuot, dodūt tom jaunu skaniejumu, bet vēļ vysmoz 30 dzīsmis kvalitativi īraksteit, kab tuos napagaistu. Itūs dzīšmu zynuotuoji palīk vacuoki i dzīd rešuok, tai ari dzīsmis teik damierstys, cikom pagaist pavysam. Daļa nu pīraksteitūs dzīšmu ir okupacejis laiku slavynūšys, tuos palīk viesturei, kai zynuošonai par itim laikim, tok īdzeivynuotys i atjaunuotys teik tuos dzīsmis, kuruos jiutama smeļdze par breiveibu, kuruos zemtekstā izsmej okupacejis laikus, prūtams, ari tuos, kuruos dzīd par mīlesteibu.

Andris Slišāns stuosta, ka leidz albuma izdūšonai kūpa ir nosprauduse mierki kotra mieneša 21. datumā izlaist jaunu dzīsmi. Itys datums izvālāts, jo tymā dobā nūteik puormainis – pavasara, vosorys, rudiņa i zīmys saulgrīži. Magisks laiks, kurā jauki ir duovuot duovonys i sajimt pasasaceišonys vuordus.

21. novembrī folklorys kūpa prezentēja pyrmū dzīsmi “Kara laukā”, 21. decembrī klauseituojim duovuoja jaunu dzīsmi “Kod īt iz balli”. Tok ituo gods 21. janvarī publicāta dzīsme “Brigaders”. Dzīsmis teicieja ir Līvija Supe, aranžeju veice FK ”Upīte” muzykanti i dzīduotuoji. Īroksts tyka veikts studejā “Bigmaar’s Record”, bet video verseju dzīsmei taiseja “Waltz Visual” kūpā ar video režisori Kati Slišāni. Video akteri – bārnu folklorys kūpys “Upīte” daleibnīki. Folklorys kūpa soka paļdis par atbolstu Vaļsts kulturkapitala fondam.

Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Boltkrīvejā.


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]