Rokstu sagataveja: portals lakuga.lv

Bārnu i saimu grupa “Rupuči”, kurā apsavīnuojuši Kristaps, Ernests i Terēze Rasimi, kai ari Luocs NuMeža, aicynoj iz draudzeigu i sirsneigu koncertu 6. majā 15.00 stuņdēs VEF kulturys pilī Reigā.

Ari da šam grupa ir koncertiejuse vairuokuos vītuos uorpus Latgolys, tymā storpā Kuldeigā, Valmīrā, Rundalē i cytvīt. Niu jautruo i humoristiskuo Rasimu saime sovus mozūs i lelūs draugus grib satikt VEF kulturys pilī Reigā (beleti daīmami ITE).

Kai pīmiņ Kristaps Rasims, tod piec pārnejuo rudiņa koncerta Latgolys viestnīceibā “Gors”, Rēzeknē, palykuse taida loba sajiuta, ka skateituojim, eipaši svareigi – mozajim klauseituojim, “Rupuču” koncerts bejuse eipaša nūtikšona. “Piec koncerta “Gorā” daudzi cylvāki nu Reigys praseja, kod taids koncerts byus ari pi jūs, nu, skaidrys, ka Reigā dzeivoj daudz latgalīšu saimu, kurim tuo latgaliskuo kasdīnā datryukst. Svareigi, ka tod, kod koncerts nūteik kur naviņ uorpus Latgolys, mes raugom ari drupeit pīsalāguot i klauseituojim īvuiceit kaidus naviņ vuordeņus,” stuosta Kristaps Rasims.

Albumā “Vuškeņa iz pļovys”, atsasaucūt latgalīšu kulturys kusteibys “Volūda” aicynuojumam, 2021. godā dzīšmu formatā puortopuši septeni literatis Ilzis Spergys saraksteiti i muokslineicys Līgys Romančukys ilustrāti bārnu dzejūļu gruomotys “Vuškeņa iz pļovys” dzejūli. Taipoš gruomota i muzykys albums bārnim “Vuškeņa iz pļovys” ir vīns nu Latgalīšu kulturys goda bolvys “Boņuks 2021” sajiemieju.