Rokstu sagataveja: portals lakuga.lv

15. junī 16.00 stuņdēs Reigā, Jāņa Akuratera muzejā, gaidoms Latgolys dzīsminīka Vinsenta Kūkuoja koncerts, kurā jis uzastuos kūpā ar dālu Rihardu, viestej publiski daīmamuo informaceja.

Latgolys dzīsminīks Vinsents Kūkuojs ar dzīšmu saceriešonu aizaruovs jau nu 16 godu vacuma. Suokumā dzīšmu vuordim izmontuojs Aleksandra Čaka dzeju, piečuok bez poša sacarātu tekstu komponējs dzīsmis ari ar tāva Ontona Kūkuoja, Pītera Jurciņa, Laimuoņa Vāczemnieka i cytu autoru dzeju. Pārņ Vinsents tics pi atzineibys ari kai dzejnīks, dzejis slamā latgaliski “Rogovkys dzejis voga” ījamūt daleitu 1. vītu.

Sovā dailradē dzīsminīks pīsavierš cylvāka dzeivis vysaidajim pagrīzīnim i problemvaicuojumim, raugūt tim dūt dzejiski rodūšu atbiļdi. Dzīsmēs vīnkuoršais mejās ar dzeivis skaudrumu, romantiskais ar suopeigai aizkustynūšū. Nasamuoksluoteiba i patīsums caurvyn vysu Vinsenta Kūkuoja sacarātū muzyku. Tys ir šudiņdīnys Latgolys dzīsminīka bolss, kas stuosta par aktualū Latgolys cylvāku dzeivēs bez līku izpuškuojumu.

Vinsents Kūkuojs ir muzykys autors vaira nakai 100 dzīsmem latgalīšu i latvīšu literarajā volūdā. Daļa nu tūs īraksteita i īkļauta 2017. godā izdūtajā diskā “Breineigō nosta”. Ir aktivs dzīsminīku kusteibys daleibnīks, pīsadalejs vairuokūs Vyslatvejis dzīsminīku saītūs, vairuokys reizis uzastuojs festivalūs “Upītes uobeļduorzs” Upītē, koncertējs muzykys i muokslys festivalā “Bildes”, kai ari Austrys bīdreibys reikuotajūs pasuokumūs.

Koncertā Jāņa Akuratera muzejā, uzastuojūt kūpā ar dālu Rihardu, skanēs i daudzys klauseituoju īmeiļuotys dzīsmis, i vairuokys jaunys kompozicejis. “Ka klauseituojs aizadūmoj, dzīsme sovu ir padarejuse,” tai par sovom dzīsmem soka pats autors.

Īīšonys moksa koncertā – 2 eiro, školānim, studentim, seniorim – 1,50 eiro.