Rokstu sagataveja: portals lakuga.lv

Lelais latgaļu tiergs itūgod atsagrīž sovā viesturyskajā nūtikšonys vītā – Ludzys piļskolnā, informej Ludzys nūvoda Turysma informacejis centrs. Tiergs byus 22. junī nu 9.00 da 14.00 stuņžu i puļcēs lelu skaita omota meistaru i apmaklātuoju.

Svātku atmosferys radeišonai vysu dīnu skanēs saulis dzīsmis i ļustēs dejis, tiks reikuotys vysaidys rodūšuos darbneicys bārnim i izzynojūšys sarunys pīaugušajim. Paraleli īsapierkšonai tiks veiti vaiņuki, kūrts tradiceju gunkurs, nūtiks vyzynuošonuos zyrga mugorā, bet eipaši skaistūs skotu maklātuojim tiks pīduovuota vareiba pasaceļt ar gaisa balonu i vērtīs iz Ludzys panoramu.

Jau nu deveņu stuņžu reitā kūpā ar pasuokuma vadeituojim Ilmāru Dreļu i Līgu Kondrāti, saulei mūstūtīs, dūdu pavadeibā i kūklis dzīsmēs tiks īgrīzti saulgrīžu rituali i Ludzys piļskolnu pīskandynuos dzīsmis i dejis. Koncerta laikā uzastuos folklorys kūpa “Ilža” i cyti Ludzys nūvoda amateru ansambli, kai ari gosti – “Bolta vīšņa” i “Andeļneicys”. Sovutīs ar deju sūlim prīcynuos vītejuos deju kūpys Sarmītis Stapulis vadeibā i cyti nūvoda doncuotuoji, bet Juoņa dīnys dzīsmis tiks īskandynuotys Laurys Kalvānis izpiļdejumā.

Lelā latgaļu tierga laikā tiks organizātys vysaidys meistardarbneicys i lelim, i mozim. Adeituoju klubs “Musturprieks” īpazeistynuos ar tamburiejumim senejūs rūcinīkūs, Ingūna Rauda aicynuos iz darbneicu “Sauļu i putynu veiduošona”, bet “Vaiņuku, zīdu guņsvāzu taiseišona i saulis vuortu meistarklase” nūtiks kūpā ar Rutu Zviedri, sovutīs bīdreiba “KIRA” vadeis kulinarejis meistarklasi. Ari gosti nu Preiļu – pludmalis kopejneica “Pampūkas” – sauks iz kūpeigu “Saulis blīnu” darbneicu. Dobys meiļuotuojim Rāznys Nacionaluo parka dobys centrys pīduovuos dobys školu par rešajim i invazivajim augim. Bārnu prīcai Gunita Mūrniece-Krišāne nu “Bencha Muude” dūs vareibu apviļkt sovu leli, bet darbneicā kūpā ar Kroma kolna bruolistis vadeituoju Aleksandru Lubānu – īpazeit latvyskuos zeimis rūtuos.