“Raxtu Raxti”, cepļa izjimšona i “Pateiba” – kū itūgod pīduovoj Lūznovys “Muokslys pikniks”

“Raxtu Raxti”, cepļa izjimšona i “Pateiba” – kū itūgod pīduovoj Lūznovys “Muokslys pikniks”

Rokstu sagataveja: portals lakuga.lv

Sastdiņ, 13. julī, nu 15.00 da 22.00 stuņžu Lūznovys muižys teritorejā nūtiks 9. muokslu i garšu festivals “Muokslys pikniks 2024”, informej tuo organizatori. Ari itūgod tys pīduovuos cīši daudzveideigu programu – vysaidu žanru muzyka, muzykaluo teatra i laikmeteiguos dejis izruodis, būru triki, “Baltās grāmatas” karuseļs, latvīšu jaunuokuo kina, muokslinīku pleners, meistarklasis, kai ari garšu ceļuojums.

“Muokslys piknika” muzykys programā varēs dzierdēt grupu “Zāle” ar maigom melodejom i naīrostim muzykys instrumentu apvīnuojumim, muzykalū apvīneibu “Kalnejas” ar tautys dzīšmu aranžejom i originalmuzyku, Marta Dreļa kvartetu ar džeza standartim i M. Dreļa, Laurys Svikšys, Mārča Lipska originalkompozicejom, duetu “Skaņu dārzs” ar sylta bolsa valdzynūšu skaniejumu i arfys kruospylnū skaidrumu, sovutīs vokora koncertā varēs baudeit labi zynomū latvīšu myusu dīnu tautys muzykys apvīneibu “Raxtu Raxti”.

Eipašais gosts, kurs apceļuojs puspasauli, būru muokslinīks The Charming Jay nu Dīnavydkorejis ruodeis magiskus puorsteigumus, būru i iluzeju performaņcis. Kai īrosts, festivalā “Muokslys pikniks” sevkuram apmaklātuojam ir vareiba pošam radeit voi palikt par muokslys pīdzeivuojuma daļu, pīsadolūt vysaiduos meistardarbneicuos (dobys izgleiteibys spēlis, sītspīde, sapynu givieju taiseišona i c.). Taipat gaidoma lelūs “Mārtiņa Burbuļu” performaņce, lelim i mozim byus vareiba trenētīs lūka saušonā i supuošonā, kai ari izalaksteit “Sviļpaunīku” teiklu parkā. Bārnim i vacuokim patiks ari “Mailīšu karuseļi”, kas ir kai stuosti par vysaidom nūtikšonom, par dobu, cylvākim i zvierenim, puorsokom i teikom. Lūznovys muižā varēs izavyzynuot karuselī “Baltā grāmata”, kas ir rakstnīka i muokslinīka Jāņa Jaunsudrabiņa stuosts par juo poša boltū bierneibu.

Itūgod pasuokumā gasteis ari Latgolys retro auto i moto klubs ar izstuodi i meistarklasi, muižā varēs apsavērt Ingys Stikutis gleznu izstuodi “Mākslai nav robežu” i foto izstuodi “Sociālā uzņēmējdarbība Latvijā”. Festivalā varēs pīdzeivuot ari laikmeteiguos dejis izruodis “Līdz nāve mūs šķirs” i “Kapeņu stāstiņi”, nūsavērt jaunuokuos Latvejis kinys, kai ari redzēt muzykalū izruodi “Tik vien Austra”, kurā pīsadola Latgolys Muzykys i muokslys vydsškolys audziekni sadarbeibā ar teatri “Joriks”.

Taipat ari itūreiz Lūznovā byus Latgolys muokslineicu apvīneibys “V.I.V.A.” pleners i pop-up galereja, kurā muokslineicys Agra Ritiņa, Vēsma Ušpele, Ilze Griezāne i Vija Stupāne pīškiers krāslim jaunu, kruosainu sajiutu, bet pi keramikys cepļa izjimšonys varēs pasarunuot ar “Cukrasātys” pūdnīkim Stanislavu Viļumu i Violu Annu Bīriņu, taipat pošim paraudzeit muola meiceišonu kūpā ar Aivaru Ušpeli. Festivala laikā byus apsaverama Evikys Muizniecis radeitūs apgierbu kolekceja “Pateiba” (tī piļneibā taiseiti nu ūtrreiz izmontuotu materialu).

Sūpluok muzykys i muokslys programai, naatjemama sastuovdaļa ir ari garšu ceļuojums, kū pīduovuos na tik vītejī uzjiemieji, bet ari tuoluoki gosti.

Apmaklātuoji teik aicynuoti leidza jimt sovys piknika skalinis i gordumus, pledus i lobu kompaneju, kab baudeitu nasteidzeigu sastdīni vysā muižys teritorejā. Īīšonys moksa – 5 eiro. Beletus var nūpierkt “Biļešu paradīzes” kasēs, škārsteiklā i Lūznovys muižā.


Print Friendly, PDF & Email