Rokstu sagataveja: portals lakuga.lv

Ceļu pi skaiteituoju suoc literatis Elizabetis (aba Ilzis Vovkys) dzejūļu kruojums bārnim “Dzejūleiši”. Tymā apkūpuoti 17 dzejūli latgalīšu rokstu volūdā par vysaiduokom temom, kas vysupyrma radeiti īsnēgšonai Pīteram Jurciņam veļteitajā literatu konkursā.

Elizabete stuosta, ka kasdīnā dzeju bārnim naroksta, deļtuo īprīšk natyka dūmuojuse izdūt bārnu dzejūļu gruomotu. Tok ar niu gruomotā publicātajim dzejūlim 2023. godā pīsadalejuse P. Jurciņam veļteitajā literatu konkursā, kur sajēme golvonū bolvu nominacejā “Bārnu literatura”. Tī tykuši raksteiti tik deļ konkursa i kab puorbaudeitu sovus spākus bārnu dzejā. Itūgod Elizabete gribējuse izdūt sovu dzejūļu gruomotu latgaliski pīaugušajim – “Voga”, tok saprotuse, ka napaspēs tū sagataveit, partū pīrakstejuse projektu bārnu dzejūļu gruomotys izdūšonai.

Jaunajā gruomotā ir 17 dzejūli. Tī ir par dažaidom temom, par pīmāru, ir dzejūli par dobu, bārnu rūtaļom, pasauļa redziejumu bārna acim i tt. Vysi dzejūleiši ir latgalīšu volūdā. Pādejuos lopuos ir dūta īspieja rodūši izapaust pošim bārnim – pamasta vīta, kur bārns var īraksteit sovu dzejūleiti i izzeimēt sovu ilustraceju. Gruomotā īspieju rūbežūs ir saglobuotys Aulejis pusei rakstureiguos volūdys sovpateibys: vuordu formys, poši vuordi ar tulkuojumim i paskaidruojumim vuordineicā, kas ir piec kotra dzejūļa.

Elizabete rokstūt jau nu školys laika. “Tai nūpītnuok suoču raksteit i syuteit dorbus avīzem i žurnalim vydsškolys laikā. Tī leluokū tīsu beja prozys dorbi. Tod kaidu šaļti raksteju reši, viņ veļtejuma panteņus dzimšonys dīnuos rodim i draugim. Atsuoču aktivuok raksteit 2020. godā piec daleibys i 3. vītys dzejneicai Velgai Krilei veļteitajā autoru-īsuocieju konkursā “Tu arī mani spēsi izpildīt”. Pa itū laiku asmu pīsadalejuse daudzūs nūvoda i Latgolas mārūga konkursūs, kurūs sajiemu atzineibys i gūdolguotys vītys,” jei nūruoda. Elizabetis dzejūli publicāti sešūs (dreiži byušūt ari septeitais) dzejis kūpkruojumūs, izdūta ari sova dzejis gruomota “Agape”, kurā daži dzejūli ir ari latgalīšu volūdā.

Dzejūļu kruojuma volūdys konsultantis beja Edeite Laime i Lideja Leikuma, muokslineica – Marika Marcinkus. Izdeviejs – “Ezerrozes grāmatas”, ar kuru autore sasadorboj vysu dorbu izdūšonā. Gruomota izdūta ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” i bīdreibys “Latgales reģiona attīstības aģentūra” daškiertū atbolstu.

Gruomota veikalūs nabyus nūpierkama. Tei tiks izmontuota Kruoslovys Kulturys i turysma puorvaļdis i Aulejis tautys noma pasuokumūs, duovuota školom, bārnuduorzim, bibliotekom i cytom īstuodem, kuruos teik kūpta i vuiceita latgalīšu volūda i saglobuotys latgaliskuos vierteibys.

Gruomotys prezentaceja gaidoma 8. septembrī Kruoslovā Tāva dīnys svātku laikā.