Rokstu sagataveja: portals lakuga.lv

12. oktobrī 14.00 stuņdēs Leivuona stykla i amatnīceibys centrā tiks atkluotys divejis izstuodis, kas veļteitys stykla pyutiejam Aleksandram Logvinam, kurs itūgod svietej 60 dzeivis i 40 dorba godu jubileju, viestej publiski daīmamuo informaceja. Izstuodē “Stikla pūtējs uz visiem 100!” byus apsaverami juo taiseitī dorbi, bet izstuodē “Personība. Stikls. Kadrs” vairuoki Latvejā zynomi fotografi byus īmyužynuojuši styklu kai materialu i Logvinu kai personeibu.

Pyrmuo asociaceja ar Leivuonu daudzim vys vēļ ir styklys, kam Leivuona stykla i amatnīceibys centrā atsarūn leluokuo stykla kolekceja Baļtejis vaļstīs i stykla pyusšonys darbneica, kura struodoj napuortrauktā režimā nu 2016. goda. Vaira par centru i tuo stykla kolekceju var skaiteit portala lakuga.lv rokstā ITE. Taišni ar stykla pyusšonys darbneicys meistara Aleksandra Logvina darbeibu saisteitys ari obejis gaidomuos izstuodis. Jis 24 godus nūstruoduojs nazkodejā Leivuona stykla fabrikā, tok niu piļsātys stykla tradicejom naļaun apseikt, struodojūt centra stykla pyusšonys darbneicā.

Nu 12. oktobra da cyta gods beigu Leivuona stykla i amatnīceibys centra lūgūs varēs apsavērt fotografeju izstuodi “Personība. Stikls. Kadrs”, kurā radzams styklys kai materials i personeiba – stykla pyutiejs Aleksandrs Logvins, kura myužs cīši saveits ar styklu. Īmyužynuot styklu fotografejuos bejs lels fotomuokslinīku izaicynuojums, kam īraudzeit i paruodeit caur fotografeju stykla eipašeibys ir sarežgeitai. Styklys var byut meiksts, veidojams i stīpams, korsts i beistams materials, tok cīši kruošņs sovā byuteibā. Izstuodē radzamūs fotografeju autori ir Didzis Grodzs, Māris Justs, Ivars Utināns, Valdis Putniņš, Ilze Onzule, Jānis Magdalenoks.

Papyldynojūt projekta “Personība. Stikls. Kadrs.” fotoizstuodi lūgūs, nu 12. oktobra da 27. novembra byus apsaverama ari Aleksandra Logvina retrospektivuo izstuode “Stikla pūtējs uz visiem 100”, kurā varēs apsavērt stykla pyutieja Aleksandra Logvina taiseitūs stykla izstruoduojumus nu Leivuona stykla i amatnīceibys centra kruojuma i izstuožu fonda. Izstuodis nūsaukums “Stikla pūtējs uz visiem 100” radeits, saskaitūt 40 stykla pyutieja dorba jubilejis godus i 60 dzeivis jubilejis godus, kas kūpā itūgod napuorprūtami veidoj Aleksandru Logvinu par stykla pyutieju iz vysu 100. Taišni jis itūšaļt uztur dzeivu stykla izstruodis tradiceju Latvejā i ir vīneigais ituo unikaluo omota tradiceju globuotuojs i turpynuotuojs.