Rokstu sagataveja: portals lakuga.lv

Latgalīšu kulturys kusteiba “Volūda”, sasadorbojūt ar Kristapu Rasimu i grupu “Rupuči”, publiciejuse latgalīšu volūdys stuņdi jaunuokūs klašu bārnim “Lels, lels okeans”, pīduovojūt vareibu izzynuot vaira ap latvīšu volūdu, pasaceit pamata lītys latgaliski i dzierdēt ari vairuokus jaunus grupys “Rupuči” skaņdorbus.

Jaunuos video nūdarbeibys garums ir drupeit viers 30 minuti, i juos mierkis ir kai tim, kurī nazkū jau zyna ap latgalīšu volūdu, tai tim, kurī nikuo nazyna, paleidzēt lobuok saprast latvīšu volūdys byušonu vysaidai, izzynuot pamata lītys ap latgalīšu rokstu volūdu, kai ari īsavuiceit sasavasaluot, saimis lūcekļu, puortykys produktu, mīsys daļu, dzeivinīku i cytu objektu/lītu nūsaukumus latgaliski. Taipat video stuņdē-pīdzeivuojumā “Lels, lels okeans” ir vareiba dzierdēt treis jaunus grupys “Rupuči” skaņdorbus, kurūs vydā ari vīna jauna dzīsme ar Ilzis Spergys dzejūļu tekstu. Ar Ilzi grupa īprīšk sasadorbuoja dzīšmu albuma “Vuškeņa iz pļovys” radeišonā. Jaunū video nūdarbeibu papyldynoj aizdavumu lopys, kuruos var zamynīluodēt, izdrukuot i nūdarbeibys laikā aizpiļdeit, styprynojūt stuņdē dzierdātū. Aizdavumu lopys var dabuot ITE.

Latgalīšu volūdys stuņdis scenareja autori ir Ilze Sperga, Kristaps Rasims, Terēze Rasima, Ernests Rasims i Edeite Laime, video fiļmiejs Ivars Utināns, video montažu taiseja “Reiga Productions” i Kristaps Rasims, bet latgalīšu volūdys stuņdis eistynuošonu atbaļstejuse Vaļsts kulturkapitala fonda mierkprograma “Latvīšu viesturyskūs zemu atteisteibys programa”.

Kai latgalīšu kulturys ziņu portalam lakuga.lv stuosta video stuņdis veiduotuojs, grupys “Rupuči” dalinīks i dzīšmu autors Kristaps Rasims, gataveit saturu bārnim i raudzeit nūturēt jūs viereibu ir vīns nu gryutuokūs aizdavumu. “Pīaugušī var vīnkuorši nūtāluot, ka jim ir interesna, bet ar bārnim ir diveji varianti – voi nu ir, voi nav. Vuiceibu video taiseišona sovā ziņā beja taids sovpateigs, pagars process. Ari izgleitojūšūs materialus ir gryušuok sataiseit, kam tī vysam juobyut pareizi, navar vīnkuorši taipat,” pīzeist Kristaps. Jis pats, koč i kasdīnā nadzeivoj Latgolā, ar bārnim i grupys bīdrim Terēzi i Ernestu runoj latgaliski, sokūt, ka nav vīnys receptis, kas lobuok paleidz īsavuiceit volūdu.

“Kū vaira vysaidu materialu, tū lobuok, bet, cikom volūda nabyus školā kai pošsaprūtama līta, bārni narunuos. Bārni runuos tod, kod i pīaugušī runuos, deļtuo tys ir ari kotrys saimis vaicuojums. Kotrys jau dora kai grib, bet mani cīši prīcynoj tuos saimis, kuramuos teik runuots latgaliski. Muni bārni ir boguoti – jī zyna i lītoj obejis latvīšu volūdys formys,” tai Kristaps Rasims.

Kristaps izsver, ka grybātūs, lai sataiseitū latgalīšu volūdys stuņdi izmontuotu ari školuos vysā Latvejā. “Kod taisejom video, mums beja taida īdūmuotuo Ventspiļs škola. Nav obligati Ventspiļs, der sevkura Latvejis piļsāta, bet pīdūmuojom, kai iz tū vērsīs jī. Aizdevem sev vaicuojumu, voi itamā školā myus saprass i byus vīglai iztvert. Tai viesturyski saguojs, ka lelā daļā Latvejis nav nūjausmis, kas tei taida latgalīšu volūda ir, deļtuo grybātu saceit, ka itys ir taids materials, kurū var apsavērt sevkura škola Latvejā, ari Ventspilī – bārni, kurī jau nazkū zyna, atkuortuos, bet puorejī – izzynuos kuo ta jauna, īpasazeis ar latgalīšu volūdu i saprass, kas nūteik gondreiž ar kotru dasmytū cylvāku Latvejā, kurs runoj latgaliski,” skaidroj Kristaps. Jis soka, ka raudzeits dareit tai, lai video patyktu pošim, bet tī, kuri verās, byutu prīceigi, izzynojūši koč kū, byutu par kū pasmaideit, lai palīk vīgla, pozitiva sajiuta, bet ari vysmoz kaidys treis lītys golvā kotram aizagiutu. “Gribīs aicynuot školys īkļaut latgalīšu volūdys pīdzeivuojumu “Lels, lels okeans” vuiceibu programuos – bārni nazkū izzynuos, bet školuotuoji varēs īdūt breivu sev vuiceibu stuņdi – īslēdzit video, atsapyutit, bet bārni pa tū laiku vērsīs i vuiceisīs!” smaidūt soka Kristaps.

Grupa “Rupuči” daļā bārnu i saimu auditorejis viereibu dabuoja ar albuma “Vuškeņa iz pļovys” dzīsmem i videoklipim, nu kurūs dažim straumiešonys platformā YouTube ir vaira nakai symta tyuksūšys skatejumu. Kai jau pīmynāts, jaunajā latgalīšu volūdys stuņdē-pīdzeivuojumā “Lels, lels okeans” ir treis muzykali grupys “Rupuči” jaunumi, taipat Kristaps stuosta, ka video ir ari jaunys Luoča NuMeža izpausmis. Īzeimejūt plānus iz prīšku, Kristaps Rasims soka, ka jim ir skaudzeite ar dzīsmem, kurys sovā vydā jau kaidu laiku spēlej i iz prīšku ari publiski varātu pasaruodeit taidys muzykalys intermedejis i mozuos blieņu akcejis. “Grybātūs vēļ nazkū publicēt, tok mes dzeivojam pasaulī, kurā klasiski dzīsmem varbyut nav vaira tik svareigys lūmys, cik vīnkuorši vajag sevkaida veida darbeibu, video – smejūs, ka iz prīšku vaira taiseisim rīlus, nu muziķu paliksim par rīlistim,” nūsmej grupys “Rupuči” puorstuovs.

Cytys grupys “Rupuči” dzīsmis i video latgaliski bārnim var nūsavērt ITE. Bet bārnim sataiseituo satura latgaliski apkūpuojums daīmams portala lakuga.lv sadaļā ITE (sadaļa teik papyldynuota).