Rokstu sagataveja: portals lakuga.lv

Latgolys regiona atteisteibys agentura (LRAA) izsludynuojuse Vaļsts kulturkapitala fonda mierkprogramys “Latvīšu viesturiskūs zemu atteisteibys programa” projektu konkursā atbaļsteituos Latgolys kulturas programys 2025 regionalūs kulturys projektu konkursu, viestej informaceja LRAA sātyslopā.

Konkursa mierkis ir veicynuot kvalitativa i daudzveideiga kulturys pīduovuojuma daīmameibu sabīdreibai i jaunradi Latgolā, kai ari veicynuot Latgolys kulturys daudzveideibys saglobuošonu i atteisteibu.

Projektu dasacejumus, saskaņā ar konkursa nūlykumu, var īsnēgt elektroniska dokumenta formā voi papeira formā. Projektu dasacejumi elektroniska dokumenta formā (paraksteits ar drūsu elektroniskū parokstu i aplīcynuots ar laika zeimūgu), juonūsyuta LRAA iz e-posta adresi kultura@latgale.lv da 2025. gods 28. marta 23.59 stuņžu. Projektu dasacejumi papeira formā juonūsyuta pa postu (ar nūsacejumu, ka posta zeimūgs ir na vāluok kai 28.03.2025.) iz adresi – Latgolys regiona atteisteibys agentura, Saulis īla 15, Daugovpiļs, LV-5401 voi juoīsnādz personeigi Latgolys regiona atteisteibys agenturā. Latgolys kulturys programys nūlykums i dasacejuma anketa atrūnama ITE.

Projektu realiziešonys laiks ir nu 2025. gods 5. maja da 2025. gods 15. decembra. Informativais seminars par projektu konkursu nūtiks 14. martā 14.00 stuņdēs Zoom platformā. Saite iz seminaru ITE. Taipat vaira informacejis par projektu konkursu i dasacejumu var sajimt sasazynojūt ar Latgolys regiona atteisteibys agenturu pa telefona numeri 29427490.

Atguodynuosim, ka Latgolys kulturys programa paradz atbaļsteit projektus, kas paradz:

• kvalitativys muokslys i kulturys daīmameibys nūdrūsynuošonu Latgolā;
• Latgolys kulturys daudzveideibys izzynuošonu, saglobuošonu i atteisteibu;
• ar Latgolu saisteitu jaunradi;
• tradicionalūs zynuošonu i omotu prasmu saglobuošonu, praktiziešonu, dokumentiešonu, izpieti, populariziešonu, i puornesi, kai ari tūs integraceju turysma aktivitatēs;
• bārnu i jaunīšu īsaisti kulturys projektu aktivitatēs i rodūšajūs procesūs;
• kulturys darbinīku, amatnīku kapacitatis ceļšonu (seminari, pīredzis apmaiņa, apvuiceibys i c.)
• Latgolys, tuos kulturtelpys i nūvodu sovpateibu paruodūšu i popularizejūšu pasuokumu nūdrūsynuošonu;
• ar latgalīšu rokstu volūdys praktiziešonu i populariziešonu saisteitu iniciativu i projektu eistynuošonu;
• daudzu godu kulturys periodikys izdavumu izdūšonu latgalīšu rokstu volūdā.