Rokstu sagataveja: portals lakuga.lv

Marta ūtruos nedelis īsacejumus sagatavejuse Diāna Apele, Rēzeknis Tehnologeju akademejis prefesionaluo bakalaura studeju programys “Dizaina tehnologejis” direktore. Diāna ir pyrmuos latgaliski raksteituos Antoninys Masiļūnis povuoru gruomotys (1992) muokslineica. Taipat Diāna beja atbiļdeiguo ari par puorizdūtū gruomotu, kas elektroniskā veidā daīmama ITE.

Sakuortuot apleicīni

Itamuos naparosti syltajuos marta dīnuos byutu grāks nasakuortuot sovu lauku sātys apleicīni, sapucēt kryumus, apgrīžūt tūs. Sagruobt pādejuos fakturaini červeļainuos rudiņa kļovu i cytu kūku lopys. Sabaruot augu saknis ar kaidu ekologisku māsluojumu, izbērt mulču i ar reizi sakuortuot sovys napruotā skrīnūšuos dūmys, pat raudzeit atslēgt sovu pruotu. Vidis sakūpšona ir kai sova veida meditaceja. Dorom tū! Vidis sakūpšonys laikā smedzini rysynoj jaunus aizdavumus, taidā veidā veidojūt jaunus neironu savīnuojumus.

“Ola Foundation” apmekliejums

Muns atkluojums paguojušajā nedeļā beja “Ola Foundation” Kīpsolā – izcyla arhitekturys, interjera dizaina, tehnologeju i muokslys sinergeja, eists šedevrs, kura arhitekts ir Uldis Pīlēns. “Ola Foundation” ir personeigs manifests par tū, kai apsaīt ar arhitekturu. Itei arhitektura byuteibā ir jaunu ideju i sinergejis telpa Latvejā. Vuordūs naaprokstoms objekts, vyss izdūmuots da vyssmolkuokajai detaļai. Īsoku tū apmeklēt arhitekturys i dizaina “medinīkim”!

Paskaiteit gruomotu “Providences liecinieks. Sarunas ar Imantu Lancmani”

Nu reita jau ar napacīteibu gaidu vokoru, kod īsarytynuošu atpyutys krāslā i suokšu sarunu ar Lancmani – Rundālis piļs atmūdynuotuoju, gleznuotuoju, muokslys viesturnīku – jau ūtrū nedeļu skaitu itū intelektuali aizraunūšū gruomotu ci caur tuos autori Inetu Meimani kai ba sasarunoju ar pošu provideņci. Cīši īsoku kotram puorskaiteit itū gruomotu! Taipat ryndā mani gaida naseņ izdūtuo Vladislava Malahovska gruomota “Mēs un viņi: latgalieši, baltieši un cittautieši starpkaru Latvijā. Latgaliešu lietas”.