Rokstu sagataveja: Edeite Laime, Laura Spundere, portals lakuga.lv

7. martā Rēzeknē, dizaina veikalā “Kabata”, iz sova debejis dorba – literarūs miniaturu i fotomuokslys sajiutu karteņu ap Latgolu “Brīnumdārzs/Breinumu duorzs” – atsliegšonu aicynuoja Evija Piebalga. Izdavuma atkluošonā sasatyka Evijis saime, draugi i atbaļsteituoji, kurūs bolsūs vokora laikā skanēja karteņuos publicātī teksti.

Jau viesteits, ka ituo gods suokuos latgalīšu kulturys kusteiba “Volūda” izdeve literaturys i fotomuokslys izdavumu ar 36 karteņom “Brīnumdārzs/Breinumu duorzs”, kurā izdavuma autore Evija Piebalga biļdēs i tekstūs obejuos latvīšu volūdys rokstu tradicejuos pasadola ap sovom sajiutom, pīredzem, lītom i vītom Latgolā. Aicynojūt atīt iz sajiutu karteņu atkluošonys nūtikšonu dizaina veikalā “Kabata” Rēzeknē, Evija raksteja: “Byus drupeit naveikli, tok nūteikti cīši sirsneigi. Formats – rodūši plyustūšs!” Tai ari saguoja, ka syltā i mīreigā sajiutā, bez eipašys steigys voi īprīšk precizi sacarātu scenareju tyka attaiseitys “Brīnumdārza/Breinumu duorza” durovys.

Atkluojūt pasuokumu, Evija saceja, ka juos “Breinumu duorzs”, īspiejams, suoce tapt jau agrā bierneibā. Jei pasadaleja ar atmiņom nu bierneibys, kod mama, ar jū īmūt da sātai, asūt dastuojuse parunuot ar kaidu cylvāku, pa tū laiku Evija īvaruojuse taidu naparostu puči, kurū tūlaik paskaitejuse par pasaulī skaistuokū. Jei jū pajāmuse rūkuos i najauši nūlauzuse. Piečuok vokorā vacuoki asūt Eviju agri nūlykuši gulātu ar aizdūmom, ka bārnam saulis dyurīņs, kam Evija sovā pruotā beja izspieliejuse scenareju, ka tei nūlauztuo puče nūteikti bejs nazkas cīši vierteigs i aiz tuo piļneigi izavāruse apslymuse. Tikai puora godu vāluok Evija “savylka” kūpā golus i saprota, ka tei puče beja parosts seipūls. Tai, cīši īspiejams, ari aizasuocs sajiutu ceļš iz “Breinumu duorzu”, bet kai īprīšk stuostejuse autore, jau konkreti sūli iz izdavuma radeišonu sparti aptyvai pyrma desmit godu, vuicūtīs analoguos fotografejis tehniku, fotografejis viesturi i fotografeju izalaseišonys principus. Tai radeits karteņu komplekts, kurā apsavīnoj fotografejis vysaiduos tehnikuos – analoguo i digitaluo, atjaunuotys fotografejis nu saimis albumu i ar myusu dīnu teleponu sagiutys šaļts nu kasdīnys dzeivis. Vaira izzynuot par izdavuma autori Eviju Piebalgu var portala lakuga.lv intervejā ITE.

”Breinumu duorza” atsliegšonā ar apsveikuma vuordim pasadaleja i poši autoris tekstus skaiteja dizaina veikala “Kabata” i “KUPP Coffee” saiminīks Oskars Maculevičs, Rēzeknis nūvoda pošvaļdeibys Kulturys i turysma puorvaļdis vadeituoja Daiga Misčenko, Latvejis Investiceju i atteisteibys agenturys Biznesa inkubatora Rēzeknē vadeituoja Skaidreite Baltace, taipat ari nūtikšonā kluotyn beja izdavuma redaktore Inka (Inga Mastiņa), dizainere Liāna Merņaka, taipat i Evijis tyvuokī ļauds – mama i krystamuote. Vokoru ar muzykalu kluotyn byušonu papyldynuoja Māris Keišs, kurs zynoms ari kai īrokstu studejis “Bigmaar’s Records” saiminīks i grupys “Unknown Artist” dalinīks.

Fotogalerejā izdavuma “Brīnumdārzs/Breinumu duorzs” atsliegšonys nūtikšona Rēzeknē, foto Arina Belova.