Rokstu sagataveja: portals lakuga.lv

Pošuos maja suokuos, 1. majā, grupa “Tautumeitas” izdeve sovu catūrtū soloalbumu “Zem Saules”, kurā vydā 10 dzīšmu, kas veļteitys latvīšu goda senejim svātkim i jūs svieteišonai.

Jaunajā grupys  “Tautumeitas” albumā “Zem Saules” (voi angliskajā nūsaukumā “Under The Solar Spell”) vydā ir 10 dzīšmu, daļa nu kurūs īprīšk publicātys kai singli, taipat albumā ir ari grupys “Eirovizejis” dzīšmu konkursa dzīsme “Bur man laimi”. Albuma veļteits latvīšu goda senejim svātkim i jūs svieteišonai. Kai jaunuo albuma dasacejumā socialajūs teiklūs soka poša grupa, jis ir stuosts ap dzeivi vīnā rytmā ar dobu – par gaismu, kas dzimst, kulminej i rymst leidza ar mums. “Kotrā dzīsmē asam dalykušys sovu sirdi i dvēseli, seņču tradicejis i zemis spāku – vysu, kū kas dīnys nasam sevī,” tai “Tautumeitas”. Vysu dzīšmu vydā itūreiz vīna latgaliski – “Dīna”. Jei veļteita Leldīnis svieteišonai i ir myusdīneiguos rytmūs grupys aranžejā taiseituo vīna nu popularuokūs Leldīnis dzīšmu latgaliski “Atīt Lendīna”. Vysu albumu var nūsaklauseit ITE, bet CD formatā nūpierkt grupys škārsteikla veikalā ITE.

Itūšaļt grupā dzīd i muzicej: Asnate Rancāne, Aurēlija Rancāne, Laura Līcīte, Gabriēla Zvaigznīte, Annemarija Moiseja i Kate Slišāne, bet albuma producenti ir Elvis Lintiņš i Reinis Sējāns. Albuma īrokstā pīsadalejuši muziki: Kaspars Vizulis, Stanislavs Judins, Nelli Bubujanca, Edgars Kārklis, Edgars Zilberts, Ilona Dzērve-Tālute, Laura Liepiņa. Skaņu īroksta inžiners beja Kaspars Bārbals, bet miksa inžineri – Gatis Zaķis i Sergejs Laletins.

“Zem Saules” ir grupys catūrtais soloalbums: 2018. godā izdūts albums “Tautumeitas”, 2020. godā – “Dziesmas no Aulejas”, 2022. godā – “Skrejceļs”, kai ari pyrma tuo albums “Lai māsiņa rotājās” (2017), kas īraksteits kūpā ar bungu i kuliņu grupu “Auļi”.

Jau svātdiņ, 4. majā, grupa brauks iz Šveici, kur Bāzelē puorstuovēs Latveju 69. “Eirovizejis” dzīšmu konkursā. Grupys uzastuošonu konkursa 2. pusfinalā varēs vērtīs 15. majā. Interveju ar grupys dalineicu Kati Slišāni par sajiutom, pīsavīnojūt grupys sastuovam, i gaidomū “Eirovizeju”, var puorskaiteit portalā lakuga.lv ITE.