Rokstu sagataveja: portals lakuga.lv

Sastdiņ, 17. majā, jau 21. reizi Latvejis muzeji i cytys sabīdryskū dzeivi veidojūšys organizacejis aicynuos apmaklātuojus izbaudeit Muzeju nakti. Piec Kulturys ministrejis snāgtuos informacejis, Latgolā itamā akcejā, kuruos tema itūreiz ir “Myusu vierteibu stuosti”, pīsadaleis 40 īstuodis. Portals lakuga.lv pīduovoj Latgolys kulturvītu pasuokumu programys apkūpuojumu, eipaši izceļūt latgaliskuos nūtikšonys. Ar vysu Muzeju nakts programu var īpasazeit ITE.

Bolvu nūvods

Itūgod 17. majs ir boguots ar vysaiduokom nūtikšonom – na tik Muzeju, bet ari Bazneicu nakts, taipat navar laist garum Latvejis izlasis hokeja spēli i Eirovizeju. Bolvūs tū vysu papyldynoj ari Vyslatvejis Zyrgu paruode. Partū ari pi Bolvu nūvoda muzeja byus apsaverama zyrgu apreikuojuma pīdarumu izstuode “Es gan zinu, ko vajaga labajam kumeļam”, sovutīs pošā muzejā varēs izzynuot tuo vierteibu stuostus ekspozicejuos i izstuodēs, tymā skaitā ari par Zīmeļlatgolys kulturys montuojumu.

Viļakys muzejā pasuokumu programu īskandynuos folklorys kūpa “Atzele”. Piečuok varēs apsavērt muzeja ekspozicejis i izstuodis, pīsadaleit viktorinā, kai ari baudeit vierteigu putru.

Tikom Baļtinovys muzejā varēs apgleznuot kūka dekorus, meklēt duorgumus, ēst Muzeju nakts zupu i, kai jau īrosts, laistīs nakts puorguojīnī.

Varakļuonu nūvods

Varakļuonu nūvoda muzejā itūreiz varēs izzynuot tuo goreiguos vierteibys – tiks atkluots sakraluos ekspozicejis papyldynuojums, pīmynūt mūcekļa nuovē aizguojušū prīsteri, teologejis doktoru Aloiziju Broku, kruojuma telpuos varēs apsavērt ekspresizstuodi “Sakrālie priekšmeti muzeja krājumā”, kai ari baudeit koncertu.

Rēzeknis nūvods

Ari Fraņča Trasuna muzejā “Kolnasāta” Muzeju nakts byus veļteita goreigajom vierteibom. Pasuokums aizasuoks piecpušdīnē ar maja dzīduojumim pi krysta i sarunom ar dzīduotuojom. Piečuok varēs dzierdēt viesturis doktoris Inesis Runcis, kai ari pravestu Aigara Bernāna i Imanta Petrovska prīškskaitejumus par maja dzīduojumim i ceļamolu krystim.

Viļānu nūvodpietnīceibys muzejā bez ekspoziceju i Anatolija Zelča gleznu izstuodis apsavieršonys Muzeju naktī gaidoms ari Rykovys etnografiskuo ansambļa izvadums “Taisuos kuozys”.

Bieržgaļa kulturys nomā, kurā atsarūn ari Ontona Rupaiņa muzejs, paradzāti Meldrys Gailānis i Līgys Mundys gruomotys “Kai palikt par eistynu luoci” prezentiešonys svātki, taipat uzastuos ari Nautrānu pogosta jaunīšu rokgrupa “Vysu voi nadaudz” i breika deju jaunīšu komanda “Mad Force”.

Sovutīs Maltys viesturis muzejs par sovom vierteibom Muzeju naktei izvierzejuši apleicīnis viesturis bolstus: zyrgu postu, dzeļžaceļu i Rozentovys muižu. Ar prīškskaitejumim uzastuos Andris Uškāns i Guntis Rasims.

Rēzekne

Ar gruomotu “Kai palikt par eistynu luoci” varēs īpasazeit na tik Bieržgalī, tok ari Rēzeknis piļsātā, kur autore 11.00 stuņdēs gasteis gruomotu veikalā “Zvaigzne ABC”.

Vokorpusē Rēzeknē suoksīs ari aktivitatis muzejūs. Latgolys Kulturviesturis muzejā varēs kai apsavērt tuo ekspozicejis i izstuodis, tai ari izzynuot muokslys nūslāpumus kūpā ar gleznuotuojim Anatoliju Zelču i Agru Ritiņu, īsasaisteit rodūšajuos darbneicuos i baudeit grupys “Disnejlenda” koncertu.

Muokslys nomā aktivitatis organizēs bīdreiba “Nezināmā Rēzekne” – ar sovim vierteibu stuostim daleisīs Ināra Juškāne, Regīna Indrike, Jurijs Nikonovs, kai ari portala lakuga.lv puorstuovis Laura Melne i Laura Spundere.

Taipat vysaiduokys nūtikšonys paradzātys ari Rēzeknis Zaļajā sinagogā, vacticeibnīku draudzis kompleksā, muokslys salonā “Mōls”, RTU Rēzeknis akademejā, Breivvaļsts duorgumu nomā i Rēzeknis zonalajā vaļsts arhivā. Ilguok apmaklātuojim attaiseita byus ari Latgolys viestnīceiba “Gors”, kurā apsaverama Latvejis Nacionaluo rakstnīceibys i muzykys muzeja izstuode “Pieskāriens”.

Ludzys nūvods

Ludzys nūvodpietnīceibys muzejā 17. maja vokorā tiks atkluota Igora Pliča jubilejis fotoizstuode “Divatā ar gaismu”, kam sekuos Dekteru amaterteatra izruode “Barona Bundula atsagrīzšona” i muzika Aināra Lipska koncerts.

Leivuona nūvods

Par boguoteigu Muzeju nakts programu guoduojs ari Leivuona stykla i amatnīceibys centrys. Gaidoms akordeonistu koncerts, jaunu izstuožu atkluošona, stykla pyusšonys paraugdemonstriejumi, kai ari vairuokys rodūšuos darbneicys.

Preiļu nūvods

Preiļūs itūgod Muzeju nakts tiks īsuokta Romys katuoļu bazneicā ar Juoņa Streiča gleznu personalizstuodi “Atvasara” i Daiņa Skuteļa koncertu. Pasuokums turpynuosīs jau Preiļu viesturis i lītiškuos muokslys muzejā, kur gaidoma treis jaunu izstuožu atkluošona.

Sovutīs Vuorkovys nūvodpietnīceibys muzejs ari izalasejs izceļt maja dzīduojumu tradiceju – Muzeju naktī paradzāti dzīduojumi pi atjaunuotuo Aizpūrīšu krysta, kai ari izstuode par apleicīnis krystim. Ar atziņom i tradicejom pasadaleis ari Rūžkolnu kulturys noma teatra kūpa “Kuo ir, tuo ir”.

Raiņa muzejā “Jasmuiža” varēs izzynuot vaira par vīnu nu ratūs Raiņa jauneibys godu autentiskūs lītu “Jasmuižā” – tintneicu, pagataveit naradzamū tinti i ar tū pīraksteit sovu viestuli, sasatikt ar Pelieča amaterteatri “O! Jezupa banda!”, kai ari pīsadaleit ekspresizstuodis “Īpašās lietas stāsts” taiseišonā.

Augšdaugovys nūvods

Skryndu dzymtys muzejs itūgod Muzeju naktī aicynuos izzynuot sova kruojuma prīškmatu, kai ari personeibu stuostus. Ar sovu pīredzi pasadaleis Brigita Madelāne, Gertrūde Rasnače, Valentins Lukaševičs i cyti, muzicēs Arņs Slobožanins. Vokora gaitā varēs pīsadaleit kulinarajuos meistardarbneicuos, izbaudeit vysaidus gordumus i siļdeitīs pi gunkura.

Muzeju naktei boguoteigu programu sagatavejs ari Naujinis nūvodpietnīceibys muzejs – paradzātys ekskursejis, rodūšuos darbneicys, kulinaruos meistarklasis, koncerti i gaismys instalaceja.

Daugovpiļs

Daugovpilī Muzeju naktī pīsadaleis 16 objekti. Daugovpiļs Nūvodpietnīceibys i muokslys muzejā paraleli ekspoziceju i izstuožu apsavieršonai varēs ari pīsadaleit senejūs omotu i rodūšajuos darbneicuos, kai ari baudeit Stanislava Broka Daugovpiļs Muzykys vydsškolys puorstuovu koncertu.

Daugovpiļs Muola muokslys centrā gaidomi ari pūdnīku paraugdemonstriejumi i vareiba izzynuot, kai skaņ sviļpaunīki. Sovutīs Latgolys kulinaruo montuojuma centrā “Šmakovka” byus latgalīšu volūdys rodūšuo darbneica.

Rotko muzejā leluokuo viereiba itūgod veļteita animacejis kinai “Straume” – varēs i tū nūsavērt, i tuos storptautyskuos bolvys apsavērt. Tok apmaklātuojim daīmamys byus ari aktualuos izstuodis, tymā skaitā Latgolys regiona muokslinīku konkursa izstuode “Vēlēšanās”.

Taipat Muzeju nakts akcejā Daugovpilī pīsadaleis ari Daugovpiļs cītūksnis, “Inženieru arsenāls”, muzejs “Ebreji Daugavpilī un Latgalē”, “Saules skola”, medicinys koledža, Daugovpiļs kulturys piļs, Raiņa centrys, Daugovpiļs zonalais vaļsts arhivs i cytys īstuodis.

Kruoslovys nūvods

Kruoslovā Muzeju nakti varēs baudeit vysā grafu Plāteru piļs kompleksā. Nūtikšonu vydā byus ari “Kroma kolna bruolistis” aktivitatis i latgalīšu tradiceju izzynuošona ar Kruoslovys folklorys kūpu “Primačkas”.

---