Rokstu sagataveja: portals lakuga.lv

Nu 3. da 6. juņa Daugovpilī nūtiks “Teatra festivals Nr.4”, kura programu veidoj Latvejis i uorvaļstu teatru izruodis, kas izaceļ i ar naīrostu formu, i šudiņdīnys cylvākam aktualu i vajadzeigu saturu, kai ari sarunys ar skateituojim i profesionaļu diskusejis par nūzarē aktualom temom. Festivala saiminīki – Daugovpiļs teatris – tamā 4. junī 20.00 stuņdēs ruodeis izruodi “Kaids nūteikti atīs” latgalīšu volūdā. Piečuok byus vareiba ari pasarunuot ar īstudiejuma rodūšū komandu.

Festivalu reikoj Daugovpiļs teatris, Dirty Deal Teatro i Gertrudis īlys teatris sadarbeibā ar Latvejis Leļu teatri. Maija Pavlova, Gertrudis īlys teatra producente, kai ari vīna nu festivala idejis autorim i organizatorim, stuosta: “Itys festivals pīduovoj myusdīneigu teatra muokslu i daudzveideibu vītā, kur tei kasdīnā nav plotai puorstuovāta. Tei ir ari kūpā saīšona teatra profesionalim, kab sezonys nūslāgumā apsprīstu tū, kas ir aktuals nūzarē i mums – teatra radeituojim, i myusu skateituojim. Pārņ izveiduotuo saikne ar skateituojim i jūs naviltuotuo interese i aktivuo leidzdaleiba sarunuos piec izruodem ir tys golvonais īmeslis, parkū gribiejom atkuortuotai organizēt itū festivalu Latgolā i paplašynuot tuo programu.”

Itūgod festivalā pīsadaleis ari uorzemu gosti: Igaunejis teatris “Eesti Noorsooteater” ar objektu teatra izruodi bārnim i jaunīšim “Myusa, prusaks i ziernyuklis”, kas nūtiks mobilajā teatrī “Karavana” – ceļuojumu pīkabē, kas puortopuse par mini teatri, kai ari trymdys boltkrīvu naatkareiguo teatra apvīneiba “Volnya Kupalautsy” ar izruodi “Zekamerons”, kas taiseita piec Boltkrīvejis politīslūdzeituo Maksima Znaka gruomotys motivu. Izruodē atspīgeļuota politīslūdzeitūs kasdīna – nūvāruojumi, kuriozi i jūki, aizkustynūšys situacejis i skaudruo realitate -, kurū papyldynoj dzeja i muzyka.

Latvejis Leļu teatris festivalā pīduovuos izruodi “Gaisma, es tevi dzirdu”, kas viestej par naredzeigu cylvāku kasdīnu, Gertrudis īlys teatris izruodeis “Spālmaņu nakts 2023/2024” bolvai nominātū muzykys teatra izruodi “Monstera Deliciosa”, kurā četrys vysaidu paaudžu sīvītis, izdzīžūt cytu sīvīšu stuostus, izstuosta ari sovejūs, bet festivalu nūslēgs Dirty Deal Teatro izruode “Tā ir mūsu kauna vaina” – vīna dīna iz zemis muzykys, dzejis, dejis i volūdys kolažā.

Sovpus Daugovpiļs teatris nūspielēs filozofiskū trilleri latgaliski “Kaids nūteikti atīs”. Izruodis režisors i Daugovpiļs teatra muokslinīcyskais vadeituojs Olegs Šapošnikovs stuosta, ka īstudiejums teatram ir lela nūtikšona partū, ka pyrmū reizi tuo viesturē latgaliski tulkuota i izvasta tik nūpītna dramaturgeja, kluotyn vēļ izruode jau sajāmuse Latgalīšu kulturys goda bolvu “Boņuks 2024”. Lela asūt ari skateituoju interese: “Da šam kotru reizi skateituoju zāle ir bejuse pīpiļdeita. Tei tiks īkļauta repertuarā ari nuokušajā sezonā, tod plānojam tū aizvest ari iz golvyspiļsātu – 12. oktobrī “Kaids nūteikti atīs” varēs nūsavērt Latvejis Nacionalajā teatrī.” 

Šapošnikovs ari dasoka, ka nav bejs švuorbu, ka taišni “Kaids nūteikti atīs” juoruoda ituo gods festivalā: “Tuo programa ir komandys dorbs, to sastatejom kūpā ar Maiju Pavlovu i Dirty Deal teatro vadeituoju Annu Sīli. Jūs redzīņs beja vīnnūzeimeigs, ka festivalā juoiekļaun taišni “Kaids nūteikti atīs”, kam tei saskaņ ar festivala tematiku ar sovu viestejumu i formu. Tys, ka izruode ir latgaliski, otkon saskaņ ar festivala saukli “Latgola ir tyvai”.” Piec kotrys festivala izruodis paradzātys ari skateituoju sarunys ar rodūšū komandu, iz kū režisors aicynoj palikt, kam tei ir unikala vareiba izsaceit sovu redzīni voi aizdūt interesejūšu vaicuojumu. “Paguojušajā godā taišni ituos sarunys ar skateituojim mums saguoduoja vysleluokū gondarejumu, tuos ir cīši vierteigys kai skateituojim, tai mums pošim. Kasdīnā eistynuot itaidys sarunys piec izruodem mes eisti navarim atsaļaut, sovpus festivals tam ir ideala platforma,” nūruoda Olegs Šapošnikovs.

Skotivis muokslys profesionalim festivalā paradzātys ari treis diskusejis. Sarunā “Muokslinīki “rameišūs” – trauslaos rūbežs klasifikacejis i puormeju vydā” tiks maklātys atbiļdis iz tū, kai saglobuot atvārtu skotu iz puormejom i atteisteibu, napagaisynojūt vareibu saprūtamai skaidruot daudzveideigū muokslys procesu skateituojim. Itamā diskusejā pīsadaleis Zane Radzobe, Henrieta Verhoustinska, Mārtiņš Eihe, Roberts Dauburs. Diskuseju vadeis Linda Krūmiņa. Ūtruo diskuseja “Stuņdis attuoluma teatris kotram Latvejis dzeivuotuojam” škatynuos vaicuojumus par kulturys daīmameibu regionūs. Sarunā pīsadaleis Andris Slišāns, Elīna Celmiņa, Evita Ašeradena, Inga Goldberga i Anda Laķe. Diskuseju vadeis – Edgars Raginskis. Teatra profesionaļu diskusejis nūslēgs saruna “Dokumentalais teatris i realitate – kūpeigais i atškireigais”, kurā tiks apsprīstys vareibys i īrūbežuojumi, kaidus snādz dokumentaluo teatra pīeja. Diskusejis dalinīki: Roberts Dauburs, Anna Belkovska, Agnese Puisāne; diskuseju vadeis Lolita Grāvīte.