Rokstu sagataveja: portals lakuga.lv

Sabīdreibys integracejis fonds (SIF) apstyprynuojs konkursa rezultatus Medeju atbolsta fonda (MAF) programā “Regionalūs, vītejūs i diasporys medeju atbolsta programa”. Nu Kulturys ministrejis budžeta daškiertūs leidzekļu programā apstyprynuoti 63 projekti. Portalam lakuga.lv daškierts finansiejums kai jaunu rokstu, tai raidīroksta “Mīti” 2. sezonys taiseišonai.

Latgalīšu kulturys ziņu portals lakuga.lv ituo gods MAF “Regionalūs, vītejūs i diasporys medeju atbolsta programys” projektu konkursā dabuojs atbolstu divejim portala īsnāgtajim projektim. Projekts “Latgaliskās kultūrtelpas dažādības, izaicinājumu un aktualitāšu atspoguļojums portālā lakuga.lv” (kūpejais finansiejums 32 842,65 eiro) ir svareigs atbolsts portala pastuoveigajai darbeibai, nūdrūsynojūt portala funkcejis, atbolstūt portala komandu i latgaliski viestejūt par latgaliskuos kulturys aktualitatem, procesim, cylvākim i nūtikšonom. Projektā plānuoti 46 roksti, kas papyldynuoti ar originalu foto saturu treis rubrikuos – “Reportaža”, “Lakuga.lv vaicoj” i “Perosneiba. Pa latgalīšu pādim” –, skaiteituoju aptaujis, kai ari vaira nakai 180 socialūs teiklu īrokstu (tymā vydā ari video formatā). Projektā portalam tolkā īt divejis jaunys žurnalistis – Anželika Litvinoviča nu Daugovpiļs, ar kurū portals jau sasadorbuojs cytūs projektūs, i Inta Marija Savicka nu Varakļuonu.

Taipat atbolstu dabuojs projekts “Raidierakstu latgaliski sērija portālā lakuga.lv 2. sezona” (finansiejums 13 291,02 eiro), kurā daškiertais finansiejums sadz izmoksys septeņu video formata epizožu sataiseišonai. Plānuotajuos epizodēs tiks atspīgeļuoti redzīni i pieteiti vaicuojumi par literaturu, jaunīšim, kulturpolitiku i cytim tematim. Projektā epizodis tiks papyldynuotys ar satura atspīgeļojūšim rokstim portalā lakuga.lv i 14 eisajim video. Taipat projektā tiks sagataveiti vysmoz 40 socialūs teiklu īroksti, kai ari tiks veikta klauseituoju redzīņa nūskaidruošona par aktualajom temom, ekspertim, vaicuojumim i atgrīzeniskū saiti socialajūs teiklūs. Pyrmū raidīroksta sezonu vari nūsaklauseit ITE.

“Medeju atbolsta fonda finansiejums ļaun portalam vaira pīsavērst analitiskuokim rokstim i taida veida publikacejom, kas prosa vaira resursu. Ari itūgod turpynuosim izvaicuot redzīņu liderus i nūzaru profesionaļus rubrikā “Lakuga vaicoj”, izzynuot latgalīšu stuostus vysā pasaulē rokstu serejā “Personeiba. Pa latgalīšu pādim” i veiduot reportažys i latgaliskūs nūtikšonu. Taipat ar prīcu varim paviesteit, ka itūgod aizsuoktais raidīroksts “Mīti” pīdzeivuos ūtrū sezonu – turpynuosim uzrunuot sovu auditoreju ari audio i video formatā, škatynojūt vysaidus Latgolys problemvaicuojumus,” soka portala lakuga.lv redaktore Laura Melne.

Ituo gods MAF projektu konkursā atbaļsteitūs projektu vydā ir 19 projekti, kas viesteis ap temom, kas saisteitys ar Latgolu.

Latgalīšu kulturys ziņu portals lakuga.lv vys vēļ ir vīneigais medejs Latvejā i pasaulī, kura saturs kasdīnā teik veiduots tikai latgalīšu rokstu volūdā.