Rokstu sagataveja: portals lakuga.lv

Šudiņ, 11. junī, pi klauseituojim nūnuok jaunuokuo apvīneibys “Latgalīšu Reps” dzīsme “Pazust Latgalē”, kurā pīsadola ari Latvejis legendaruokais muzykys eksperimentātuojs – Roberts Guobziņš (Gobziņš). “Dzīsme ir ironiska i reizē sirsneiga atsauce iz Guobziņa 90. godu hitu “Aka Aka”, tok itūreiz ar golamierki Latgolys vierzīnī – vītu, kur mīrs i autentiskums vēļ nav pagaisuši,” tai “Latgalīšu Reps” dalinīki.

Leidza ar dzīsmi teik izlaists ari videoklips, kas izjimts ar izteikti humoristisku tūni. Klipā grupys “Latgalīšu Reps” dalinīki Ivo i Didzis uzajam uorstu lūmys i izmontoj “uorstnīceibys mašynu”, kab raudzeitu gluobt Robertu Guobziņu, kuru steidzami vajag nūvest iz Latgolu. Tok itei “uorstnīceibys mašyna” nav parosta – tei ir iluzoriskys ekskurseju autobuss, kas skateituojus aizvad cauri absurda i Latgolys nūskaņu sajaukumam.

Video kulminacejā nūteik puorsteigums – rodūšais Roberts Guobziņš komiski dzymdynoj bārnu. Itys absurdais pagrīzīņs ir kai atsauce iz vacū latvīšu kinu ar laimeigom beigom, kur bārna pīdzimšona simbolizej cereibu, turpynuojumu i, prūtams, dzeivis svieteišonu.

“Nu ūtrys pusis – grybu pazust Latgolā, lai nabyutu īmesļa navajadzeigai trauksmei, cytaiži Reigā vysu laiku keep cool on the street,” komentej pats Guobziņš.

“Es saprūtu, ka cytim var byut prīškstots, ka “pazust Latgolā” nūzeimoj nūbraukt i nūsadzert iz treis dīnom ci iz nedeli, kai kuram tys maratons. Nā, eistineibā, mes iz tū veramēs pavysam nu cytys pusis – mums bīži saīt byut Reigā, i mes redzim, cik cīši urbanuo vide tevi daspīž skrīt, aizmierst par svareigom lītom. Nadūd tev šaļti atsasēst, padūmuot i nu molys patiemēt iz vysu, kū tu dori, jo esi taidā kai žurku skriejīnī. Mums “pazust Latgolā” nūzeimoj aizbraukt iz vītu, kur laiks sinhronizejās ar cylvāku, kur ir leluoka harmoneja i pavysam cyta vide. Ka esi stresa pylnā dzeivis ritmā, tod padūmoj par sevi i lēc mašynā, viļcīnī ci autobusā, brauc iz Latgolu i nūviertiesi tū, kū rezultatā dabuosi,” tai Ivo Grigalis.

“Pazust Latgalē” ir muzykala ekskurseja storp laikim, vītom i ironeju, kas reizē gūdynoj Latgolys kulturu i volūdu i ļaun pasavērt iz muzykys muokslu breivuok – bez rūbežu i aizsprīdumu. Dzīsme pīraksteita apvīneibys “Latgalīšu Reps” muzykalajā nūmetnē, kur pīsadaleja ari Matīss Repsis (tausteni) i grupys bundzinīks Rihards Špacs. Dzīsmis tekstu autori ir Didzis Kozlovs i Ivo Grigalis, kai ari pats Roberts Guobziņš. Videoklipu uzjēme operators i režisors Ritvars Bluka. Skaņu apstruoduoja Jānis Šmēdiņš (“Prime Time Studio”), bet platis skruopēje Kaspars Dziļums (DJ Aspirins).

Dzīsme nu 11. juņa daīmama vysuos straumiešonys platformuos. Taipat grupa aicynoj sekuot leidza grupys jaunumim i koncertim “Latgalīšu Reps” socialūs medeju platformuos ITE.

Galereja nu “Pazust Latgalē” videoklipa fiļmiešonys. Foto nu apvīneibys “Latgalīšu Reps” arhiva