Rokstu sagataveja: portals lakuga.lv

Pīktdiņ, 27. junī, storptautyskuo folklorys festivala “Baltica” laikā svineigā ceremonejā padūs Tradicionaluos kulturys izcileibys bolvu folklorys nūzarē. Itūgod bolvu sajims Jelgovys piļsātys pošvaļdeibys īstuodis “Kultūra” folklorys kūpys “Dimzēns” vadeituoja Velta Leja, kai ari Rēzeknis nūvoda Rykovys pogosta kulturys noma etnografiskais ansamblis “Rikava”, viestej Latvejis Nacionaluo kulturys centra (LNKC) puorstuove Lana Kazlauskiene.

“Itys ir vīneigais vaļsts apbolvuojums tradicionaluos kulturys jūmā, kurū ik piec treis godu nu 2022. gods pīškiram folklorys, tautys muzykys i tautys lītiškuos muokslys nūzarē, i itūgod ir kuorta folklorai,” stuosta LNKC direktore Signe Pujāte. “Tū sajam reizi cylvāka myužā voi muokslinīcyskuo kolektiva darbeibys laikā par izcylu dorbu, seviškim nūpalnim voi byutysku īguļdejumu sova nūvoda voi piļsātys kulturvidis veiduošonā i uzturiešonā. Itūgod ir gūds apbolvuot divejis izcileibys – spūdru personeibu nu Zemgalis i etnografiskū ansambli nu Latgolys. Obeju laureatu dorbs ir cīši saisteits ar tautys tradiceju saglobuošonu, izpieti i nūdūšonu paaudzem iz prīšku.”

Etnografiskais ansamblis “Rikava” ir vīns nu senejuokūs etnografiskūs ansambļu Latvejā i pārņ nūsvieteja 70 godu jubileju. Pādejūs 15 godus kolektivu voda Aija Dundure. “Rikava” ir vīneigais ansamblis Latvejā, kas taisa etnografiskus izvadumus, izmontojūt namaterialuo kulturys montuojuma elementus: dzīsmis, ticiejumus, parunys, tradicionalū apgierbu, vysaidys godskuortu i myuža gūdu īražys, kai ari kulinarū montuojumu i pat tradicionalus sadzeivis prīškmatus. Ansambļa ilggadejī vadeituoji i dalinīki nūpītnai pīsavārsuši Latgolys kulturviesturyskuo montuojuma saglobuošonai i nūdūšonai tuoļuok. 

“Etnografiskūs ansambļu golvonais aizdavums, vysupyrma, ir saglobuot i tuoļuok nūdūt sova nūvoda i apleicīnis tradicionaluos kulturys montuojumu paaudzem iz prīšku. Pa ūtram, īpazeistynuot ar ituom tradicejom Latvejis nūvodu ļauds i interesentus aiz vaļsts rūbežu. Ar itim aizdavumim “Rikava” jau 70 godu teik golā veiksmeigai, i ansamblis i tuo vadeituoja Aija Dundure ir peļnejuši atzineibu!” pastreipoj Latvejis Universitatis Literaturys, folklorys i muokslys instituta vodūšais pietnīks Aigars Lielbārdis.

Sovutīs ūtrys bolvys laureatis Veltys Lejis vadeibā folklorys kūpa “Dimzēns” ir apzynuojuse i apkūpuojuse Zemgalis namaterialū kulturys montuojumu – suocūt ar gūdu dzīsmem i beidzūt ar godskuortu īražu tradicejom, izdūdūt itū boguoteibu CD formatā, kab tei byutu daīmama sevkuram interesentam. Veltys Lejis vadeituo kūpa vysod bejuse Dzīšmu i deju svātku dalinīku vydā, poša daudzus godus īsasaistejuse festivala “Baltica” reikuošonā. “Dimzēnā” dorbojās saimis vairuokuos paaudzēs.

Tradicionaluos kulturys izcileibys bolvys folklorys nūzarē apbolvuošonys ceremoneja nūtiks Reigā, Mozuos Giļdis Lelajā zālē 27. junī 15.00 stuņdēs. Pasuokumu vadeis etnomuzikologs Valdis Muktupāvels.

Lāmumu par apbolvuojuma pīškieršonu pījam LNKC izveiduota komiseja, kuruos sastuovā ir Kulturys ministrejis Kulturpolitikys departamenta direktoris vītneica Agnese Rupenheite, LNKC Folklorys nūzaris konsultativuos padūmis prīšksādātuoja Anda Skuja i padūmis lūcekle Zane Šmite, kai ari LNKC Viesturyskūs zemu i namaterialuo kulturys montuojuma nūdalis vadeituoja Jana Vērdiņa i LNKC Namaterialuo kulturys montuojuma eksperte Gita Lancere.

Bolvys laureati sajims Gūda diplomu i naudys bolvu. Pyrmū Tradicionaluos kulturys izcileibys bolvu folklorys nūzarē 2022. godā sajēme Uotaņku etnografiskais ansamblis i tradicionaluos kulturys pietneica, muzike Iveta Tāle. 

Storptautyskuo folklorys festivala “Baltica” laikā nu 26. da 29. juņa Reigā, Siguldys nūvodā i Daugovpilī nūtiks 35 vysaidi pasuokumi, kas veļteiti festivala golvonajai temai – volūdai. Vaira par festivalu var puorskaiteit ITE.