Rokstu sagataveja: portals lakuga.lv

Latgolys Regionaluo televizeja (LRT) jau daudzu godu garumā izaceļ kai ar intervejom latgaliski sovūs ziņu sižetūs, tai ar pošu taiseitajim raidejumim latgalīšu volūdā. Ari niu televizeja struodoj pi vysaidu latgaliskūs projektu ap Latgolu.

Nu maja beigu taidūs ziņu raidejumūs kai “Runoj Latgola”, “Reģionālās televīzijas piedāvā” i “Pieci novadi Latvijā” TV24 i ReTV kanalūs ir īkļauti i iz prīšku byus radzami sižeti latgalīšu volūdā par Vaļsts kulturkapitala fonda mierkprogramys “Latvīšu viesturyskūs zemu atteisteibys programa” finansiali atbaļsteitajim projektim. Da ituo gods beigu kūpā tiks sataiseiti deveni stuosti par projektim i tūs eistynuotuojim. Pyrmī stuosti jau ir izskaniejuši. Vīns nu taidu beja par aktivitatem Rēzeknis nūvoda Rogovkā – 14. tautys muzykantu saītu aba večerinku “O, bļaka!”. Izskaniejs ari stuosts par keramika Pītera Gailuma pīmiņai veļteitajom muola meistarklasem.

Taipat Sabīdreibys integracejis fonds LRT apstyprynuojs treis projektus Medeju atbolsta fonda programā “Regionalūs, vītejūs i diasporys medeju atbolsta programa”. Vīns nu taidu ir septeņu raidejumu cyklys latgalīšu volūdā “Latgolys susātivs – turpynuojums”, kas viesteis par aktualim problemvaicuojumim Latgolā – bezdorba cālūnim, inflaceju regionā, izaicynuojumim medicinys nūzarē, turysma atteisteibu, izgleiteibys reformys sakom i tt. Latgaliski “susātivs” ir āna, i tys ir golvonais raidejuma vadmotivs – pasavērt iz situacejom nu cytys pusis. Par pyrmū raidejumu cykla sezonu vaira izzynoj ITE.

Kūpā ar taidim Latgolys regiona medejim kai “TV LATVIJA” i “5 labas ziņas” tiks taiseits ari četru raidejumu cyklys “Latgales pūra lāde – atdzimšana” par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā byus atspīgeļuoti pīmāri, kai senejuos tradicejis teik atdzeivynuotys myusu dīnu vidē – tradicionalūs zaļumbaļļu atdzimšona, plūstu tradiceju populariziešona Daugovys lūkūs, plūstu atjaunuošona i tūs maketu taiseišona, kai ari meistarklasis par tradicionalajim iedīnim i tūs vierteibu Eiropys Savīneibys leiminī, taipat ari folklorys kūpu i vītejūs teicieju izveiduotī dzīšmu kruojumi.

“Projektu eipašuo lūma ir tei, ka zinis i raidejumus latgalīšu volūdā ruoda televizejā vaļsts leiminī. Cylvāki var nūviertēt, ka volūda atsateista i tū var lītuot na tik saimē i sātā, bet ari publiskajā telpā. Tymā pošā laikā teik veicynuota puornūvadnīku izpratne, ka vītejī dzeivuotuoji kasdīnā aktivi sasazynoj latgaliski. Stuostu i raidejumu autori ir žurnalisti, kuri poši īt nu Latgolys i kurim dzymtuo volūda ir latgalīšu. LRT žurnalisti regulari mudynoj intervejamūs, vysaidu nūzaru puorstuovus, profesionaļus i vītejūs dzeivuotuojus snēgt intervejis latgaliski, taidā veidā saglobojūt volūdys byušonu kluotyn masu medejūs, kas itūšaļt ir izaicynuojums. Partū ir svareigi sajimt atbolstu pylnvierteigai stuostu radeišonai latgaliski,” tai LRT redaktore i žurnaliste Marta Puzāka.