Rokstu sagataveja: portals lakuga.lv

Vīns nu vystradicionaluokūs saulgrīžu aba Juoņa dīnys laika iedīņu ir sīrs. Itūreiz aicynojam sevkuru paraudzeit sasīt pošam sovu sīra rytuli. Sovā receptē ar portalu lakuga.lv pasadoluos Rēzeknis restorana “Mes zynom/We know” vadeituoja Ineta Lontone.

Ineta ar humoru stuosta, ka jauneibā, kod vuoriejuse sovu pyrmū sīru, aiz najiegšonys dalykuse vuoreitys ūlys, tok ari tys beja gordai i naīrostai! Itei recepte ļaunūt vysaiduokus eksperimentus piec sirds patikys.

Sastuovdalis:

• 1 litrs pīna, sevkura, kas daīmams veikalā;
• 4 ūlys;
• 300 g skuoba kriejuma, lobuok 20 %, ari nu sevkura veikala;
• suoļs piec garšys.

Gataveišonys process:

1. Izsylda, tok naaizvuorej pīna.
2. Cytā traukā sajauc ūlys ar kriejumu i suoli, davīnoj izkarsātajam pīnam.
3. Karsej, maisūt iz vidiejis guņs, cikom atsadola pīna sulenis.
4. Sagatavej mytru marleiti, īlīk tū duršlakā, nūlej tymā syltū sīru, ļaun škidrumam nūtecēt i līk zam slūga, cikom sīrs atdzīst, vysulobuok iz nakti. Nu reita nūjam marleiti. Var baudeit iz reizis, var drupeit apkaļtēt nu obeju pušu, tod veiduosīs taida kai gorūzeņa.
5. Ka ir gribiešona, sīru var apkaiseit ar garšaugim. Var vydā likt rīkstus, sieklenis, vysu kas garšoj.

Ineta ari dasoka, ka itū sīru var marinēt, kai arī cept i iz ponnys, i iz grila. Pi seve restoranā tū pasnādz captu iz grila kūpā ar Mežavydu tomatim, garšojūt dyžan gordai!