Rokstu sagataveja: portals lakuga.lv

Prīškā četrys breivdīnys, kas dūd vareibu pylnvierteigai nūsvieteit kai vosorys saulgrīžus, tai Juoņa dīnu. Vys jau partū ari Latgolā itūgod gaidoma seņ naradzāta pasuokumu daudzveideiba – vysvysaidys nūtikšonys byus kai leluos piļsātuos, tai nalelūs pogostūs. Portals lakuga.lv īsoka, kū apmeklēt voi pasavērt nu 20. da 24. juņa. Ar vēļ plotuoku nūtikšonu sarokstu var īpasazeit portala kalendara sadaļā.

Nu Daugovpiļs caur Dubulim iz Prīkulim i Seiļukolnu

Aktiva svātku svieteišona suocās jau šudiņ, 20. junī. Daugovpilī saulgrīžu nūtikšonys suoksīs 17.00 stuņdēs, kod Vīneibys noma Tradiceju sātā byus juoņa zuoļu meistarklase. Piečuok varēs izzynuot ari zuoļu čaju vierteiguos eipašeibys i sīra sīšonys nūslāpumus. 20.00 stuņdēs byus sasadzīduošona, apdzīduošona i daņči folklorys kūpys “Svātra” vadeibā.

Tikom Rēzeknis nūvoda Dubuļūs gaidoma saulgrīžu nakts “Zalta rosa rūtojās”. Tī byus i tierdzeņš, i rodūšuos darbneicys, kam sekuos svātku koncerts, Saļņovys amaterteatra izruode “Puordūtī svātki” i balle.

Preiļu nūvoda Prīkuļu pamatškolys sporta laukumā 20.00 stuņdēs paradzāta folklorys kūpu sasadzīduošona “Cik jauki vosor’s laiceņā”, bet Seiļukolnā – īleiguošona kūpā ar Rūžkolnu amaterteatri i Gaļānu vokalū ansambli.

Nu Latgolys dīnavydu da zīmeļu

21. junī latgaliskys nūtikšonys var atrast vysā Latgolā. Jau nu 9.30 stuņžu reitā leidz pat 14.00 stuņdem dīnā Ludzā vysus pierkt i puordūt grybātuojus varēs satikt Lelajā Latgaļu tiergā. Ari Daugovpilī itamā dīnā natryuks tierguošonuos i ļustiešonuos – tī nu 10 stuņžu reitā leidz 16.00 stuņdem piecpušdīnē gaidoms nu jau tradicionalais pasuokums “Latgalīši sabrauc Daugovpilī”.

Dīnavydlatgolā gaidoms latvyskuos dzeiviszinis festivals “Tiekamies vasaras saulgriežos”. Tuo nūtikšonys byus Ondrupinē, Škaunē i Dagdā.

Rogovkā, Nautrānu kulturys centrā, 19.00 stuņdēs paradzāta eipaša pyrmizruode piec Ontona Kūkuoja scenareja radeitam skotivis dorbam “Kuozu laiki Latgolā”, kurā kuozu tradicejis izspielēs vītejī pošdarbeibys kolektivi.

Sovutīs Bolvu nūvoda Upītē, kai jau kotru godu, 21.00 stuņdē byus pasuokums “π-dzīdam” ar vītejūs grupu, kai ari gostu uzastuošonu.

Nu Varakļuonu caur Kryšānim iz Saļņovu

22. junī vysi Dekteru amaterteatra cīneituoji var laistīs iz Varakļuonim, kur 15.00 stuņdēs byus izruode “Barona Bundula atsagrīzšona”.

Itamā dīnā tiks svieteiti ari Bolvu nūvoda Kryšānu pogosta svātki. Vysaidu nūtikšonu vydā tī 19.00 stuņdēs byus ari jaunuokuos latgalīšu jūku gruomotys “Īdzersem iz celekuojes!” attaiseišonys svātki i tautys muzykantu saīts.

Vokorā ari īleiguošonys pasuokums Ludzys nūvoda Saļņovā. Tī ari ruodeis vītejuo amaterteatra izruodi “Puordūtī svātki” (itymuos breivdīnuos tū var paspēt nūsavērt vysaiduos Latgolys vītuos i pasuokumūs) i byus zaļumballe ar vītejūs muzykantu grupom.

Nu Leiksnys caur Maltu i Gaigalovu iz Mežavydim

23. junī leiguot kūpā aicynoj Leiksnys kulturys dzeivis organizātuoji. Tī gaidoms na tik koncerts i zaļumballe, tok ari septeitais latgalīšu skriejīņs kažukūs.

Ari Rēzeknis nūvoda Maltā itymā vokorā paradzāts kai koncerts i balle, tai naparostuokys aktivitatis, pīmāram, Juoņa dīnys stafetis, kuruos varēs ceineitīs par eipašim dizaineris Evikys Muizniecis kolekcejis apgierbim.

Tikom Gaigalovā tradicionali 23. juņa vokors ir amaterteatra “Bykovīši” pyrmizruodis laiks. Itūreiz tei byus Monikys Zīlis komedeja “Pylns džentlmeņa komplekts”.

Ludzys nūvoda Mežavydūs svātki tiks svieteiti ar tradicejom, dzīsmem, daņčim i humora pylnu izvadumu “Ni centa napanēme”.

Juoņa dīna pi televizora

Ka nu pošā Juoņa dīnā, 24. junī, nabyus lobs laiks, bāduot navajadzēs. LTV1 saguoduojuse latgalisku programu vairuoku stuņžu garumā – 14.30 stuņdēs byus Latvejis Nacionaluo teatra izruodis “Latgola.lv 2” īroksts, kam sekuos Andra Baltača taiseituo kina “Atgriežamies Latgolā. Post scriptum” par pārņ ruodeitū izvadumu “Atgriežamies Latgolā”.