Rokstu sagataveja: portals lakuga.lv

Svātdiņ, 29. junī, gaidoma Pīterdīna. Tradicionali tei latgalīšim bejuse cīši nūzeimeiga – kai lela “svātdīne”, kod nadreikstēja struoduot fizisku dorbu. Tok piec bazneicys apmekliešonys ļauds ļustēja opluotūs i zaļumballēs, i ari myusu dīnuos vairuokuos Latgolys vītuos teik plānuota eipaša Pīterdīnys svieteišona.

Pīterdīnys nedeļgols Rogovkā

Piec dzejnīka Pītera Jurciņa (1932-2004) nūīšonys myužeibā Nautrānu pogosta Rogovkā par tradiceju palyka eipaša Pīterdīnys svieteišona. Pasuokuma formats kotru godu ir cytaids. Itūgod svātki suoksīs jau 28. junī ar Motopīterdīnu, kod ceļā nu Rēzeknis iz Rogovku laissīs motobraucieji. 16 stuņdēs pi Nautrānu kulturys centra tiks dūts starts pasuokuma muzykalajai programai, kurū pīduovuos Sovvaļnīks i Mareks, kai ari grupys “Marysana” i “Gandreiž 10nīkā”.

Sovpus 29. junī Rogovkā tiks gūdynuots Pīteru davums Nautrānu pogostam i Latgolai. Pasuokuma laikā nūtiks rodūšuo darbneica ar muolu, meistarklasēs “Muols rūkuos” radeitūs dorbu izstuode, Pītera Miglinīka dzīšmu laseišona, tautys muzykanta Pītera Belinska muziciešona i Pīteram Jurciņam veļteituo literatu konkursa nūslāgums. Pasuokumā uzastuos Sovvaļnīks ar Mareku, kas izpiļdeis dzīsmis ar Pītera Jurciņa vuordim, kai ari grupa “Klezmeri”, kas īpazeistynuos pasuokuma apmaklātuojus ar ebreju tautys muzyku, kas ari ir daļa nu Latgolys kulturviesturyskuo montuojuma.

Keramikys pikniks Pīterkolnā

28. junī aizsuokt Pīterdīnys svieteišonu varēs ari cytā Rēzeknis nūvoda vītā – Ūzulainis pogosta Pīterkolnā. Tī byus keramikys cepļa izjimšona, pikniks, meistarklasis, kai ari grupys “Auzys” koncerts. Pasuokuma nūslāgumā pi gunkura varēs nūslēgt ari saulgrīžu svieteišonu.

Pīterdīnys sagaideišona Rūžupē

Leivuona nūvoda Rūžupē itūgod paradzāta Pīterdīnys sagaideišona, kas aizasuoks 28. juņa deveņūs vokorā. Vysupyrma byus sadoncuošona, piečuok – Daugovpiļs tymsi zyluo kora koncerts, bet nūslāgumā – zaļumballe ar grupu “Starpbrīdis”.

Festivals “Baltica” Daugovpilī

Portals lakuga.lv jau viestejs par storptautyskuo folklorys festivala “Baltica” nūtikšonom. Festivala nūslāguma dīna byus taišni 29. junī, kas saīs ari kai Pīterdīnys (Latgolā sauktys ari Petrine, Petrika), ar kurū nūsaslādz Juoņa dīnys laiks, svieteišona. Daļa festivala daleibnīku sabrauks jau 28. juņa vokorā i sasatiks sasadzīduošonā i daņčūs, bet 29. junī byus plota festivala programa, kurei nu reita aizasuoks ar reita kopeju i sarunu ar Orestu Silabriedi, piečuok nu 11 da 14.30 stuņžu Skulpturu duorzā Reigys–Mihoelsa īlu krystā, Daugovpiļs Dizaina i muokslys vydsškolys “Saules skola” pogolmā, Daugovpiļs Nūvodpietnīceibys i muokslys muzeja īškpogolmā, Vīneibys noma koncertzālē, Dubrovina parkā i Daugovpiļs Svātuo Pītera kēdēs Romys katuoļu bazneicā skanēs folklorys kūpu dīnys koncerti “Gūdam laižu volūdeņu”.

Festivalā taipat byus omotu prasmu darbneicys, amatnīku i sātā ražuotuoju tiergs, daleibnīkus vysys dīnys garumā gaideis orientiešonuos kaita “Es raženi izstaigovu…”. Nu 15 da 15.30 pa Reigys īlu nu Stacejis īlys da Vīneibys laukuma paradzāts festivala daleibnīku guojīņs i nūvodu sasasaukšona Vīneibys laukumā, bet 16 stuņdēs Andreja Pumpura skverā nūtiks festivala nūslāguma koncerts “Dzeivuo volūda”, kuram leidza sekuot varēs ari LR3 eterā.

Pīterdīna “Zvejnīkūs”

29. junī folkloru varēs pīdzeivuot na tik Daugovpilī, bet ari Īdeņā aba Iudiņu solā. Tī 15 stuņdēs zvejnīku sātā “Zvejnīki” gaidoms Rykovys etnografiskuo ansambļa izvadums “Pi azara loba dzeive”, kas veļteits ituos vītys saiminīka Juoņa Macāna pīmiņai.