Rokstu sagataveja: Amanda Anusāne/portals lakuga.lv

Svātdiņ, 29. junī, Rogovkā tyka gūdynuots Pīteru davums Nautrānu pogostam i Latgolai. Pasuokumā beja apsaverama meistarklasēs “Muols rūkuos” radeitūs dorbu izstuode, muzicēja tautys muzykants Pīters Belinskis, pasuokumā uzastuoja ari Sovvaļnīks ar Mareku, kai ari grupa “Klezmeri”. Taipat tyka skaiteitys Pītera Miglinīka ailis, kai ari nūtyka Pīteram Jurciņam veļteituo literatu konkursa nūslāgums ar laureatu apbolvuošonu i humoresku skaiteišonu Ērikys Bozovičys i Ingara Gusāna izpiļdejumā. Piec īprīškejuos dīnys pasuokuma “Motopīterdīna” apleicīnē varēja redzēt ari pa kaidam motokluba “LATIGOLA MCC” mocikletam, iz kurūs piec pasuokuma tyka vyzynuoti bārni.

Agruok latgalīšu tradicejuos Pītera i Puovula dīna (saukta ari Petrine, Petrika) 29. junī beja tik nūzeimeiga, ka jamā atsaturēja nu kaida fiziska dorba, par gūdu itim svātajim apustulim daudzuos Latgolys bazneicuos turēja 40 stuņžu atlaidu mišus. Ļauds piec bazneicys ļustējuos tiergūs i zaļumballēs, lyka goldā čymynu sīrus i maizeitis, vāzis ar pļovu pučem. Piec Pītera dīnys vārušīs, kaids byus turpmuokais laiks. Myusu dīnuos reši kurs vairs svietej Pīterdīnu, tok Rogovka jau divdesmit pyrmū reizi vysus aicynuoja iz itim svātkim – tei ir namaineiga nautrānīšu tradiceja 29. junī gūdynuot dzejnīku Pīteri Jurciņu (1932–2004) i vysus pogosta Pīterus. Kotru godu itū pasuokumu Rogovkā svietej cytaižuok. Ir bejuši koncerti, teatru izruodis, vakariešonys pi gunkura, pogostu amatermuokslys kolektivu uzastuošonys, Pītera Jurciņa pīminis šaļts Desetnīku kopūs i cytys aktivitatis.

“Pīters jau Latgolā ir izplateits vuords, tok pādejā laikā itū vuordu vaira bārnim nalīk. Ite pa Rogovku jau ir Pīteri, tok na daudzi. Vyspuor kaidus 10 zynu, muns krysttāvs ir Pīters Belinskis. Pīterdīnu eipaši nasvynu, tok Rovovkā vysod ir pasuokums, nūteikti asu tymā. Itūgod tys ir grandiozs – Pīterdīna jau īsasuoce vakar ar motobrauciejim, ar lelu dyukūni pa Rogovku. Maņ napateik taids trūksnis, tok tys radeja naparostuoku nūskaņu,” tai vītejuo dzeivuotuoja i pasuokuma apmaklātuoja Maruta.

“Muns vactāvs beja Pīters, muna veira styprynuotais vuords ir Pīters, kūpā pazeistu kaidus pīcus. Pīterdīna ir breineigs pasuokums, kod var nūbraukt gostūs iz Rogovku. Ruodīs, ka ite kluotīnē byušu pyrmū reizi. Es ari īsyuteju sovu dzeju literatu konkursam. Saprūtu, ka byus cīši dzīšmuots pasuokums, sagaidu lobys emocejis i byušonu kūpā. Itymā pasuokumā var satikt rodūšus i seņ naradzātus cylvākus,” tai pyrma pasuokuma saceja literate Inga Kaļva-Minina.

Literarais konkurss, lai gūdynuotu dzejnīka, izcyluo nūvadnīka Pītera Jurciņa pīmiņu, taipat kai Pīterdīnys svieteišona aizasuoce 2004. godā i niu palics par īrostu kulturys nūtikšonu goda daļu, Pīterdīnys pasuokumā Rogovkā izceļūt ari myusu dīnu literatu dorbus. Laureatu vydā ituo gods Pīteram Jurciņam veļteitajā literatu konkursā ar moto “Dzeive vysim suoteiga, bet na vysim pruoteiga” beja treis literati. Kategorejā humoreska uzvarēja Aija Mikele, kategorejā dzeja laurus plyuce Rasma Svikle-Popova, tok kategorejā bārnu literatura par lobuokū tyka pīzeits Elizabetis aba Ilzis Vovkys dorbs. Taipat konkursā pīsadaleja taidi latgaliski rokstūši, jau zynomi i jauni autori kai Ivo Gilučs, Zaiga Lāce, Valdis Grakis, Irēna Batare, Valija Platace, Inga Kaļva-Minina, Arvīds Gļauda, Inita Sabanska, Dace Tihovska, Solvita Daukste, Klaudija Dembovska i Ilmārs Dembovskis. Kūpā konkursam tyka īsnāgts 21 dorbs – pīci humoreskys, desmit dzejis, seši bārnu literaturys kategorejuos. Itūgod literatu konkursa žurejis komisejā dorbuojuos Veronika Dundure, Laura Melne, Valentins Lukaševičs i Jurs Cybuļs. Uzvarātuoju dorbus dreizumā varēs puorskaiteit ari portalā lakuga.lv.

Meistarklasis ar muolu i pasuokums “Pīterdīna Rogovkā 2025” ir projekta “Pīteru pādi Rogovkā” aktivitatis, kas sajāmušys finansialu atbolstu “Latgolys kulturys programys 2025” projektu konkursā i kurys realizēja Rēzeknis nūvoda Nautrānu apvīneibys puorvaļde. Sovpus Pīteram Jurciņam veļteitais literatu konkurss ir daļa nu literaruos jaunradis latgaliski veicynuošonys pasuokumu programys, kū organizēja Rēzeknis nūvoda Nautrānu apvīneibys puorvaļde i latgalīšu kulturys kusteiba “Volūda”.

Galerejā biļdis nu Pīterdīnys Rogovkā. Foto: Amanda Anusāne/portals lakuga.lv