Rokstu sagataveja: portals lakuga.lv

Nu 5. marta kotru nedeļu tyka publicāts vīns skaņdorbs nu Latvejis Leļu teatra izruodis “Sunāns!”, kurūs speciali tai komponiejs i sarakstejs Kristaps Rasims, bet īdzīduojuse grupa “Rupuči”. Kūpā ir septenis dzīsmis, tuos vysys niu daīmamys grupys “Rupuči” YouTube kanalā.

Izruode “Sunāns!”, kas veiduota piec Laurys Meļnis i Viviannys Mariis Stanislavskys komiksa “Sunāns breiveibā” motivu pyrmizruodi pīdzeivuoja ituo gods 27. februarī, tok komiksa ceļš pi skaiteituoju suocēs 2023. gods martā. Vaira ap izruodi var izzynuot Ilzis Spergys puordūmuos ITE, tok ITE vari apsavērt, kai nūtyka gataveišonuos izruodei i kai roduos ideja tū īstudēt. Niu zynoms Latvejis Leļu teatra repertuars leidz pat septembram, beletus iz izruodi “Sunāns!” var nūpierkt bilesuparadize.lv. 7. majā paradzāta ari vīsizruode Rēzeknē, Latgolys viestnīceibā “Gors”.

Izruodis “Sunāns!” skaņdorbu komponists i vuordu autors ir Kristaps Rasims. Vysys dzīsmis izruodei tyka saraksteitys jau mienesi pyrma i tikai vīna nu dzīšmu nateik atskaņuota izruodē. “Dzīsmis ir kai lobs dalykums izruodis pamatstuostam,” soka Kristaps. Pats Kristaps ir prīceigs par padareitū: “Tys beja breineigs process. Maņ cīši patyka. Itys beja vīns nu ratūs projektu, kur iz pyrmū mieginuojumu jau atguoju ar gotovu materialu. Režisore Liena Šmukste maņ jau laiceigi beja paviestejuse sovu redzīni, idejis, kū jei grybātu dzierdēt, sarakstejuse tezis. Maņ parosti vysim ir taids lyugums, lai konkreti nūformulej, kū grib, kam mes jau kotrys cytaiži jiutam i dūmojam. Dzīsmis ar reizi vysi akceptēja kai tekstuali, tai muzykali. Pošā izruodis režejā es nasajauču, izjamūt muzykys i volūdys vaicuojumus, ka taidi beja, kam muns aizdavums beja – ka runojam latgaliski, tod dorom tū maksimali pareizi.”

“Kūpumā asu daudz dzeivuojīs pa teatrim ar muzyku. Leļu teatrī itei beja muna pyrmuo reize, tok cereju, ka na pādejuo. Niu tys ir īkustynuots, i tai kai kotrys dasmytais Latvejis dzeivuotuojs ir latgalīts, tod teatra direktors Mārtiņš Eihe ir pasūlejs, ka kotra dasmytuo izruode byus latgaliski, tik jis pats tū da gola nazyna,” pasasmejūt soka Kristaps.

Vēļ jis pīzeist, ka pādejā laikā pošam ir gadejīs aizīt iz daudzom na tik lobom izruodem i ruodejīs, ka teatrī vyss ir švaki, bet tod jis aizguojs iz puora Leļu teatra izruodem i saprats, ka tī vyss ir forši. “Nav tai, ka es nasaprūtu pīaugušūs temys, bet līta taida, ka pīaugušajim ir vīgļuok koč kū švaku īmuoneit. Bārnim tū izdareit ir gryuši, kam jī vysu cīši labi redz i poši seve namuoneis. I itys ari byutu vieliejums mums vysim, ka bārnus muoneit navajag!”

Dzīšmu īraksteišonys procesā golvonais miksa masters beja Luocs Nu Meža, pīsadaleja ari Zane Dziesma i Deniss Smirnovs, bet leluokū daļu dorba padareja Kristaps ar bārnim Ernestu i Terēzi ci grupa “Rupuči”.

Tai kai Kristapa bārni Ernests i Terēze ir jau gona leli, tod aktuals ir vaicuojums, voi varim vēļ kū sagaideit nu jūs iz prīšku. Kristaps ir puorlīcynuots, ka “Rupuču” konteksts ir nabeidzams i naizslādz verseju, ka vāluok bārnus varātu pamaineit mozbārni.

Kristaps ari stuosta, ka reši kod speciali izruodei taiseituos dzīsmis izīt uorpus teatra, kam asūt taidys dzīsmis, kurys navar atdaleit nu izruodis, bet ituos varūt dzeivuot sovu dzeivi.