Rokstu sagataveja: portals lakuga.lv

Latgalīšu kulturys kusteiba “Volūda” aicynoj jaunīšus pīsadaleit latgaliskajā seminarā “Atzolys”, kas nu 3. da 7. augusta nūtiks Ludzys nūvoda Kuorsovā. Kai viestej seminara reikuotuoju puorstuove Agnese Skangale, jimā varēs pīsadaleit jaunīši vacumā nu 16 da 21 goda, lai vuiceitūs latgalīšu rokstu volūdu, īpasazeitu ar myusu dīnu Latgolys personeibom i procesim, izzynuotu regiona kulturviesturi i ituos šaļts īspiejis jaunīšim. Kotru seminara reizi jaunīši realizej kaidu praktisku ideju, itymā godā tei byus vysmoz vīna jauna latgaliska kaita jaunīšim i saimem.

Jaunīšu seminars “Atzolys” paradzāts nu 2026. gods 3. da 7. augusta Ludzys nūvodā Kuorsovā. Taišni Kuorsovā sovulaik, 2004. godā, nūtyka pyrmuos “Atzolys”. Seminarā pīsadaleit varēs jaunīši nu 16 da 21 goda ar interesi vuiceitīs latgalīšu rokstu volūdu, runuot latgaliski, īpazeit latgaliskū kulturu i vierteibys, lai styprynuotu sovu identitati, byutu zynūši par procesim, nūtikšonom i personeibom Latgolā i latgaliskajā kulturā, iz prīšku poši vaira īsasaisteitu piļsūniskuos sabīdreibys veiduošonā, kai ari socializātūs, veiduotu jaunus kontaktus, satureigi pavadeitu laiku, īsadvasmuotu nu Latgolā aktivūs ļaužu i vaira izzynuotu Kuorsovu, tuos apleicīni i aktivūs dareituojus.

Seminara mierkis ir veicynuot izpratni par kulturys daudzveideibu kai globalu vierteibu i styprynuot jaunīšu leidza atbiļdeibu ilgtspiejeigys regionaluos atteisteibys veiduošonā i kulturys montuojuma saglobuošonā caur latgalīšu volūdys i identiatis prizmu. Īprīškejais seminars tyka reikuots Kruoslovys nūvoda Dagdā  2024. godā, itaida aktivitate jaunīšu auditorejai nūteik reizi divejūs godūs. “Atzolys” sovulaik bejs kai atspierīņa punkts ari daudzim itūšaļt latgaliskajā kulturtelpā pazeistamim aktivistim vaira izzynuot i īsasaisteit kulturys i sabīdryskajūs procesūs.

“Īprīkšejais seminars, kas nūtyka Dagdā, paruodeja, ka latgaliskais interesej naviņ Latgolys jaunīšus, bet ari cytu Latvejis nūvodu i uorzemu jaunīšus. Vairuokim jaunīšim seminars beja motivaceja suokt voi vaira runuot latgaliski kasdīnā, par kū asam cīši, cīši prīceigi. Itūgod seminars “Atzolys” atsagrīž sovā pyrmajā nūtykšonys vītā – Kuorsovā –, kur jaunīšim byus vareiba vaira īpazeit Latgolys kulturu i volūdu, kai ari pošim byut latgaliskuos kulturys leidza veiduotuojim – radeit sovu kaitu latgaliski. Taipat prīcojamēs, ka jaunīši piec seminara turpynoj īsasaisteit latgaliskajuos aktivitatēs. Par pīmāru, ituo gods seminara vadeituoja poša ir diveju īprīškejūs seminaru dalineica,” soka latgalīšu kulturys kusteibys “Volūda” vadeituoja Amanda Anusāne.

Ar jaunīšim seminarā struoduos: kuorsavīte i mūdis dizainere Laima Jurča, improvizators Kozmens (Mārtiņš Kozlovskis), latgalīšu volūdys specialiste Edeite Laime, taipat seminarā gasteis ari cyti lektori, aktivisti i latgalīšu kulturys personeibys. Kūpā ar pyrmuo plānuotuoja latgaliski “Giut breidi” i kaitys “A kas ite?” idejis autori Līgu Springu, golda kaitys “Čipierksneits” idejis autori i dizaineri Jolantu Keišu i cytu latgaliskūs kaitu idejis autorem i dizainerem, jaunīši dorbuosīs praktiski i poši radeis sovys kaitys latgaliski, kū piečuok kūpā ar latgalīšu kulturys kusteibu “Volūda” raudzeis puorvērst eistūs i plotuok lītojamūs produktūs.  

Vysys seminarā paradzātuos aktivitatis, ādynuošona i nakšņuošona byus bez daleibys moksys, dalinīkim pošim tik juonūdrūsynoj tikšona iz i nu seminara. Kab pīsadaleitu seminarā, jaunīšim da 15. juņa vajag aizpiļdeit dasacejuma anketu ite: https://ej.uz/atzolys2026. Apstyprynuojumu par pīsadaleišonu seminarā reikuotuoji nūsyuteis da 20. juņa, jamūt vārā dalinīku motivaceju pīsadaleit seminarā.  

Seminara nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, LAPAS (Latvejis Platforma atteisteibys sadarbeibai) projekts “GearUp!”, kū eistynoj ar Eiropys Savīneibys finansialu atbolstu, i Latgolys kulturys programa, kurū eistynoj Latgolys regiona atteisteibys agentura ar Vaļsts kulturkapitala fonda mierkprogramys “Latviešu vēsturisko zemju attīstības programma” atbolstu. Seminara reikuotuojs – latgalīšu kulturys kusteiba “Volūda”. 

Seminarā Dagdā 2024. godā jaunīši kūpā ar raidejuma “Pīci breinumi” komandu taiseja raidīrokstu, jū var nūsaklauseit ITE, bet 2022. godā kūpā ar reperi Ūgu i īrokstu studeju “Bigmaar’s Records” topa apvīneibys “Atzolīši” skaņdorbs “Zalts sudobra vītā”.