Rokstu sagataveja: portals lakuga.lv

Nu 15. da 17. juņa Augšdaugovys nūvoda Vyšku, Īlyukstis i Naujinis bibliotekuos gaidomys Eiropys Arheologejis dīnu nūtikšonys. Ituo pasuokuma mierkis ir daleitīs ar zynuošonom par arheologiskū montuojumu vysā Eiropā. Arheologejis dīnu laikā tiks kūpeigai dūmuots par sovys vītys viesturi, diskutāts par arheologiskuo montuojuma nūzeimi i myusdīneigom vareibom tū pieteit, puorvaļdeit i aizsorguot.

Augšdaugovys nūvods ir boguots ar arheologiskū montuojumu. Itūgod paīt 40 godu, kai Slucišku vydslaiku kopūs tyka veikti arheologiskī izrokumi. Arheologe Gunita Zariņa pietejuse Slucišku dzeivuotuoju dzeivis kvalitatis ruodeituojus nu 15. da 17. godu symta. Sovpus Baiba Īvāne Slucišku izrokumus vāruojuse bārna acim i apkūpuojuse saimis atminis par vosorom Slucišku apleicīnē. Cikom Augšdaugovys nūvoda Vyšku i Piļskaļnis pogosti ir vītys ar leluokū piļskolnu eipatsvoru.

Kai doluos Augšdaugovys nūvoda kulturys montuojuma eksperte Ināra Mukāne, pasuokumi par arheologeju ir svareigi, itei montuojuma daļa vys vēļ ir apdraudāta, nūteik nalykumeigi izrokumi, teik maituotys i pagaisynuotys senvītys, ari senlītys. “Augšdaugovys nūvoda viesturyskais montuojums vīnnūzeimeigi ir saistoms ari ar Eiropys kulturys montuojumu, vystik par arheologeju arviņ runoj cīši moz, tei nav populara zynuotnyska tema. Ir svareigi, ka itymā pasuokumā byus ari vareiba pošim zemu saiminīkim vuiceitīs atpazeit vierteibys. Mums ir juorauga runuot par itū trauslū temu i juomazynoj “malnuo arheologeja”. Pa munam, cīši interesants byus Latvejis Universitatis Viesturis instituta vodūšuos pietneicys Gunitys Zarinis stuostejums, kam jei Slucišku senkopu viesturi ir pietejuse ar jaunom, interesantom metodem,” stuosta Ināra Mukāne.

Jei ari nūruoda, ka ituo pasuokuma vajadzeibom tyka īsnāgti diveji dasacejumi – vīns Fraņcejis Kulturys ministrejis i Fraņcejis Vaļsts preventivuos arheologejis institutam, kas ir golvonī pasuokuma organizatori Eiropys leiminī, bet ūtrys – Vaļsts Kulturkapitala fondam. Obeji dasacejumi tyka atbaļsteiti.

Pasuokums byus unikala vareiba sasatikt Latvejis vodūšajim viesturis pietnīkim, profesionalim i jaunim arheologim, ari Nacionaluos kulturys montuojuma puorvaļdis puorstuovim, kab kūpā sasarunuot par senejūs piļskolnu vierteibom i rysynuojumim tūs saglobuošonā. Byutiski, ka ari kulturys montuojuma eipašnīkim byus vareiba sajimt arheologu konsultacejis par darbeibom tūs eipašumā, arheologiskajom izpietem byuvnīceibys dorbūs i tt. Sovpus 17. junī vysim interesentim tiks organizāta ekskurseja iz Dinaburgys piļskolnu i Sluciškom.

Pasuokuma programa

15. junī nu 11 da 13 stuņžu Vyšku pogosta bibliotekā (Vyšku tehnikums 18, Vyšku pogosts, Augšdaugovys nūvods).

Augšdaugovys nūvoda arheologiskūs pīminekļu stuosti.
Antonija Vilcāne, Latvejis Universitatis Latvejis viesturis instituta vodūšuo pietneica

Piļskolnu legendys Helmys Hansonis gruomotuos.
Juoņs Strods, Vyšku pogosta bibliotekys vadeituojs

Piļskolni i akmini.
Ivars Logins, nūvodpietnīks

Golvonī normativī reguliejumi arheologejis montuojuma aizsardzeibā.
Nacionaluos Kulturys montuojuma puorvaļdis Latgolys regiona nūdalis puorstuovi

16. junī nu 11 da 12.30 stuņžu Īlyukstis piļsātys bibliotekā (Breiveibys īla 12, Īlyukste, Augšdaugovys nūvods).

Piļskaļnis pogosta arheologiskuos vierteibys. Piļskaļnis piļskolnu atkluošonys gaita.
Juris Tālivaldis Urtāns, Latvejis Kulturys akademejis Kulturys i muokslu instituta vodūšais pietnīks

Arheologiskī izrokumi Piļskaļnis piļskolnūs: regionalais konteksts, tradicejis, kontakti I interpretacejis.
Vanda Haferberga, Latvejis Universitatis Humanitarūs zynuotņu fakultatis Viesturis i arheologejis nūdalis pietneica

17. junī nu 11 da 13 stuņžu Naujinis bibliotekā (Daugovys īla 34, Kraujis cīms, Naujinis pogosts, Augšdaugovys nūvods).

Slucišku 15.–17. godu symta dzeivuotuoju demografeja i veseleiba.
Gunita Zariņa, Latvejis Universitatis Latvejis viesturis instituta vodūšuo pietneica

Latvīšu zemnīku religiskī prīškstoti nu raksteitim olūtim i arheologiskim materialim.
Tatjana Bogdanoviča, Latvejis Universitatis Latvejis viesturis instituta pietneica

Stuovūt pi atsagta vydslaiku kopa. Personiskys stuosts par bierneibys vosorom Slucišku apleicīnē 20. godu symta beiguos.
Baiba Īvāne, Solyspiļs nūvoda bibliotekys golvonuo bibliografe

Ekskurseja iz Dinaburgys piļskolnu i Sluciškom nu 13 da 15.30 stuņžu. Sasapuļciešona pi Naujinis bibliotekys.

Vysi interesenti aicynuoti dasasaceit daleibai da 10. juņa, aizpyldūt tīšsaistis anketu ITE.