Rokstu sagataveja: portals lakuga.lv

Nu 1. da 2. juļa Leivuona nūvoda Jersikys pogosta lobsajiutys kompleksā “Avotiņš” nūtiks “Kūpīnu persilade” (“Kopienu persilāde”), viestej pasuokuma organizatori – Latvejis Lauku forums. Ituos nūtikšonys mierkis ir veicynuot diskusejis, uzticeibu i sadarbeibu sovā vydā, taipoš ari vaicuot jaunus rysynuojumus kūpīnu leidzdaleibai i ilgtspiejeigai lauku atteisteibai. “Kūpīnu persiladē” aicynuotys pīsadaleit aktivuos lauku kūpīnys, vīdī cīmi, kūpīnu atteisteituoji i interesenti.

“Kūpīnu persilade” nūteik reizi divejūs godūs i ir Latvejis lauku kūpīnu i vīdūs cīmu vosorys forums, kurā teik aicynuotys pīsadaleit kai kūpīnys, tai vīdī cīmi, aktivys navaļstiskuos organizacejis, taipoš ari pošvaļdeibu i vaļsts puorvaļdis puorstuovi, politikys veiduotuoji, uzjiemieji i cyti. Kai pastreipoj Latvejis lauku foruma puorstuovi, tei ir breineiga vareiba vysim saīt kūpā i daleitīs zynuošonuos, idejuos i pīredzē, kab veiduot Latvejis kūpīnys spiejeiguokys, pošpīteikamuokys i nūtureiguokys.

Īprīškejais “persiladis” pasuokums beja 2024. godā Sielejis pusē, Bebrinē, kur sarunu temati pamatā beja ap kūpīnu sadarbeibu, kūpīnu dorbu ilgtermiņā i rodūšu pīeju kūpīnu vajadzeibu rysynuošonai. Sovpus itūgod akcents ir iz individualū i kūpīnu nūtureibu vysaiduoku križu gadīņūs. Latvejis Lauku foruma organizatori pastreipoj, ka itamā “persiladē” vīns nu byutyskuokūs vaicuojumu byus jaunais Eiropys Savīneibys daudzgodu budžets, kas ir naatjamams reiks lauku regionu atteisteibai.

“Kūpā ar VARAM asam izstruoduojuši pietejumu, kurā akcentejam napīcīšameibu iz vysaida veida statistikys datim vērtīs caur “lauku filtru”. Kab redzēt realū ainu, ir cīši byutiski piļsātys i lauku teritorejis vērtīs atseviški, tok na mozuok svareigi ir pasavērt ari vēļ mozuokūs leimiņūs, kam, par pīmāru, kaids nūvods kūpumā statistikys datūs izaver labi, tok situaceja dažaidūs pogostūs ir stypri atškireiga. Taipoš ir bejuši gadīni, kod atseviškūs pietejumūs situaceju apsaver piļneigi vierspuseji plānuošonys regionu leiminī, kas ir pavysam nakorekti i naparuoda realū ainu, tei atškireiba storp piļsātu, nūvodu i mozim pogostim ir miļzeiga,” doluos foruma organizatori, kuri ari pastreipoj, ka Lauku foruma viersmierkis ir kustynuot svareigus vaicuojumus i proaktivi dūmuot, kai iz prīšku uzlobuot situaceju regionūs.

Ituo gods programā paradzātys paneļdiskusejis i paraleluos praktiskuos sesejis. Pyrmajā dīnā gaidoma paneļdiskuseja “Kū lauki zyna taidu, kū cyti vēļ nav saprotuši?” i vairuokys paraleluos praktiskuos sesejis, par pīmāru, “Krīze? Maņ ir plāns! Tiksim golā”; “Kai saglobuot mīru situacejā, kū navari izmaineit” i tt. Sovpus ūtruos dīnys paneļdiskusejis temats ir “Voi laukūs vēļ ir tīseibys palikt?“, cikom paralelajuos praktiskajuos sesejuos tiks runuots par itaidim tematim: “Kai lauku bolsu īlikt sistemā?”; “Mums ir Padūme! Kū dareit?” i tt. Lektoru i paneļdiskuseju dalinīku i vadeituoju vydā paradzāti kai Latvejis, tai Latgolys regiona mārūga eksperti, tūs vydā bīdreibys “Latvijas Lauku forums” izpylddirektore Anita Selicka, bīdreibys Preiļu-Leivuona nūvodu partnereibys “KŪPĀ” administrativuo vadeituoja Valija Vaivode, bīdreibys “Zero Waste Latvija” puorstuove Evija Uozuola-Uozoliņa (Ozola-Ozoliņa), marketinga i zeimyna vadeibys profesionaļs Raimonds Platacis i cyti. Pylnu pasuokuma programu var apsavērt ITE. Interesenti aicynuoti registrētīs, aizpyldūt dasacejuma anketu da 11. juņa.