Rokstu sagataveja: portals lakuga.lv

Sabīdreibys integracejis fonds (SIF) apstyprynuojs Medeju atbolsta fonda (MAF) Regionalūs, vītejūs i diasporys medeju atbolsta programys konkursa rezultatus. Programā apstyprynuoti 62 projekti, kam daškierti leidzeikli nu Kulturys ministrejis budžeta. Portalam lakuga.lv daškierts finansiejums kai jaunu rokstu, tai raidīroksta “Mīti” 3. sezonys taiseišonai.

Latgalīšu kulturys ziņu portals lakuga.lv ituo gods MAF Regionalūs, vītejūs i diasporys medeju atbolsta programys projektu konkursā dabuojs atbolstu divejim portala īsnāgtajim projektim. Projekts “Latgaliskās kultūrtelpas izzinošs un analītisks atspoguļojums portālā lakuga.lv” (finansiejums 33 375,83 eiro) ir svareigs atbolsts portala pastuoveigajai darbeibai, nūdrūsynojūt portala funkcejis, atbolstūt portala komandu, kab latgaliski viesteitu par latgaliskuos kulturys aktualitatem, procesim, cylvākim, nūtikšonom i kulturvītom. Projektā plānuoti 55 roksti, kas papyldynuoti ar originalu foto i video saturu pīcuos rubrikuos – “Reportaža”, “Lakuga.lv vaicoj”, “Personeiba. Pa latgalīšu pādim”, “Ticeibys i volūdys krystapunktā” i “Latgolys kulturvītys tyvplānā” –, skaiteituoju aptaujis, kai ari vysmoz 275 socialūs teiklu īroksti. Itymā projektā portalam tolkā īt jauna žurnaliste – Latvejis Universitatis latvistikys studente Indra Koroļonoka, kura ituo gods suokuos izguoja praksi portalā lakuga.lv.

Taipat atbolstu dabuojs projekts “Latgaliskais raidieraksts “Mīti” portālā lakuga.lv | 3. sezona”, kurā daškiertais finansiejums (9 961,24 eiro) sadz izmoksys četru video formata sereju sataiseišonai. Plānuotajuos serejuos tiks atspīgeļuoti redzīni i pieteiti vaicuojumi par ministreju byušonu kluotyn regionūs, par kulturys nomim pogostūs, hip-hopu kai myusu dīnu kulturys kanona vierteibu i projektu konkursu nūzeimi latgaliskajā kulturā. Taipat tiks veikta klauseituoju redzīņa nūskaidruošona i atgrīzeniskuo saite socialajūs medejūs. Pyrmū i ūtrū raidīroksta sezonu vari nūsaklauseit ITE.

“Daškiertais finansiejums ļaus portalam turpynuot aizsuoktū dorba vierzīni analitiskuoka satura taiseišonā. Itūgod škatynuosim vysaidus problemvaicuojumus, intervēsim personeibys, veiduosim reportažys nu nūtykumu vītu, tyvuok izzynuosim Latgolys kulturvītu stuostus i raudzeisim nūskaidruot katuoļu bazneicys lūmu myusu dīnu Latgolā. Taipat turpynuosim veiduot audio i video saturu latgaliski, taisūt raidīroksta “Mīti” 3. sezonu,” soka portala lakuga.lv i projektu vadeituoja Amanda Anusāne.

Ituo gods MAF projektu konkursā atbaļsteitūs projektu vydā ir 24 projekti, kas viesteis ap temom, kas saisteitys ar Latgolu. Ar vysim apstyprynuotajim projektim var īpasazeit ITE.

Latgalīšu kulturys ziņu portals lakuga.lv vys vēļ ir vīneigais medejs Latvejā i pasaulī, kura saturs kasdīnā teik veiduots tikai latgalīšu rokstu volūdā.