Rokstu sagataveja: portals lakuga.lv

Vosorys saulgrīžu tyvuošonuos laikā sovus kulturys īsacejumus sagatavejuse folk/death metala grupa nu Daugovpiļs “Varang Nord”. Sovā dailradē grupa puorsvorā izmontoj latgalīšu volūdu, partū ari rekomendej breivū laiku pavadeit eistyn latgaliskā jutūnē.

Izkuop nu škārsteikla i īej dobā

Itepat Latgolys tyvumā sylti īsokom apmeklēt dobys līgumu “Pilskalnes Siguldiņa”. Tamā ir vairuokys izzynojūšys i vīnkuorši skaistys pastaigu stygys, kas byus interesantys sevkura vacuma puorstuovim, bet eipaši tyva myusu sirdei ir taišni styga “Vēstures liecinieki”. Tai kai viesturyskais montuojums i atmosfera mums ir svareiga, tod ari ite asūšuos Pyrmuo pasauļa kara pamastuos līceibys i Vuocejis armejis aizsorgbyuvis ir viereibys vārtys.

Pīdzeivoj saulgrīžu mageju

19. junī 21 stuņdī gribim aicynuot sevkuru latvyskūs tradiceju cīneituoju iz Maduma parku, kur byus saulgrīžu īskandynuošonys pasuokums “Laimes ķērāju taka”. Maduma parks puortaps par saulgrīžu sajiutu i pīdzeivuojumu vītu, kur sasatiks doba, muzyka i guņs. Pasuokumā uzastuos ari VAAKS / VAKUUMS, didžeridu i elektroniskuos muzykys improvizacejis puorstuovs, nūtiks meditativais koncerts ar grupu “Soundive Voices”, pierts rituali, pušnakts mauduošonuos i daudzys cytys nūskaņu pylnys aktivitatis.

Atrūņ vīnu muzykys pasuokumu uorpus sovys īrostuos komforta zonys

Syltuo sezona ir eistuo šaļts, kod laistīs pīdzeivuot aizraunūšys vītys, nagaideitu muzyku i satikt jaunus cylvākus. Īrūsynojam sevkuram itūnedeļ attaiseit pruotu ari kaidam varbyut sev natipiskuokam pasuokumam – partū īlyudzam iz smoguos muzykys vokoru 20. junī Daugovpilī, kur iz vosorys terasis “Grill Ember” skotivis (Reigys īlā 14) nu 19 stuņžu kuops grupys “Varang Nord” (folk/death metal), “Morphide” (modern metal) i “Dark Matter” (thrash metal). Byus skali, byus jaudeigi i nūteikti atdareis vēļ naradzātus apvuoršņus daudzim.