Rokstu sagataveja: portals lakuga.lv

Itūgod Juoņa dīnys breivdīnys byus cīši garys – vasalys pīcys dīnys. Svātku nūtikšonys Latgolā suoksīs jau pīktdīnis vokorā i turpynuosīs leidz pat 24. juņa reita gaismai. Portals lakuga.lv īsoka septeņus latgaliskus pasuokumus, kū napalaist garum, tok ar vēļ plotuoku nūtikšonu sarokstu var īpasazeit portala kalendara sadaļā.

Lelais latgaļu tiergs Ludzā

Tradicionali pyrma Juoņa dīnys Ludzys piļskolnā nūteik Lelais latgaļu tiergs, kurā var tikt pi vysaidu lobumu svātku svieteišonai. Itūgod pasuokumu deveņuos stuņdēs nu reita atkluos ar postfolklorys grupys “Rikši” koncertu, kam sekuos vareiba īpazeit cylvāka myužu i tradicejis dejuos i dzīsmēs. Tiergā varēs nūpierkt amatnīku i mozūs ražuotuoju dorbus, Juoņa dīnys sīru i olu, vaiņukus i lyna kraklus. Taipat byus vaiņuku peišonys, dobys i tradiceju meistarklasis, gunkurs, vyzynuošonuos ar zyrgim i vareiba sameiļuot sātys lūpeņus.

Saulgrīžu vokors Ambeļūs

21. junī vysi aicynuoti goda eisuokū nakti pavadeit Augšdaugovys nūvoda “Ambeļu skreinē”. Folklorys kūpa “Speiga” sūlej, ka byus dzīsmis, daņči i rūtalis. Pasuokuma suokums – deveņuos stuņdēs vokorā.

“Trīnis grāki” Nautrānu gaumē

22. junī Rēzeknis nūvoda Nautrānu kulturys centrā jau trešū godu piec kuortys byus vītejūs pošdarbnīku radeits koncertizvadums – itūreiz īstudāta Rūdolfa Blaumaņa luga “Trīnis grāki”. Lūmuos: Maruta Miščenko, Jurs Krišāns, Ralfs Bilinskis, Arita Gailuma, Inguna Duplinska, Guntis Laizāns, Eduards Kukurs i Solvita Daukste-Saleniece. Piec koncertizvaduma paradzāta kūpeiga Juoņa dīnys gunkura aizdegšona, Juoņu i Līgu gūdynuošona, kai ari ļusteigi daņči kūpā ar muzykantu Aigaru Kaupužu.

“Pī-dzīdam” Upītē

Bolvu nūvoda Upītē tradicionali pyrma Juoņa dīnys nūteik pasuokums “Pī-dzīdam”. Vysapyrma, nu ostoņu stuņžu vokorā, byus īleiguošona ar folklorys kūpu “Upīte”. Piečuok sekuos ari grupu “Unknown Artist”, “Kei-Rei”, “Krēsla” i “Dekk” uzastuošona. Kotru reizi pasuokumā ir ari eipašī gosti – itūgod tei ir grupa “JUUK”.

Īleiguošona Aulejā

22. junī īleiguošonys pasuokums byus ari Kruoslovys nūvoda Aulejis estradē. Tī nu ostoņu stuņžu vokorā paradzāta folklorys kūpu uzastuošona, meistardarbneicys, sīra viršona iz dzeivuos guņs, gunkura degšona, saulis pagūdynuošona i zaļumballe.

Izruode, koncerts i balle Aglyunā

23. juņs byus nūtikšonom boguota dīna Preiļu nūvoda Aglyunā. Pa dīnu Aglyunys aktivuos atpyutys vītā pi Ciriša azara byus vysaiduokys sportiskys i rodūšys aktivitatis, sovutīs vokora programa Aglyunys breivdobys estradē tiks īsuokta ar teatra draugu kūpys “Gaisma” izvastū Rasmys Zarinis dorbu “Munu jaunu dīnu zeme” ar Aizkaļnis tautys noma muokslinīcyskajim kolektivim i deju kolektivu “Dancari”. Tam sekuos dzīduotuoja Igo koncerts i zaļumballe ar grupu “Jasmuižas zēni”.

Leiguošona ar Kazjuku Daugovpilī

23. juņa vokorā Juoņa dīnys sagaideišona paradzāta ari Daugovpilī, Stropu estradē kūpā ar Kazjuku ci akteri Ritvaru Gailumu. Pasuokumā pīsadaleis Vīneibys noma deju kolektivi “Laismeņa” i “Pienupīte”, pyutieju orkestris “Daugava” i Daiga Kolesničenko, grupys “Laimas muzykanti” i “Tranzīts”, sovutīs piec pušnakšu gaidoma diskoteka ar dīdžeju Edgaru.