Rokstu sagataveja: portals lakuga.lv

Muziks Sovvaļnīks publicējs teksta video dzīsmei “Digitals katuoļs”, kas viestej par pasauļa vierteibu puormejom. Dzīsmis teksta autore ir Marija Dzeisla, kurys dzeju Sovvaļnīks sovā dailradē izmontojūt pyrmū, tok na pādejū reizi. Ar itū dzīsmi Sovvaļnīks ari paviestej, ka i fiziskā formatā, i digitalajuos platformuos nu 1. juļa daīmams ari juo jaunais albums “Cārtumi”.

Dzīsmis “Digitals katuoļs” teksta video veiduotuojs Dāvis Kots soka: “Dzīsmis video centrā ir diveji jaunīši, kuri rauga īslēgt televizoru. Televizors kolpoj kai metafora paaudzēs nūdūtajam kulturys montuojumam. Sovutīs obeju varūņu mejīdarbeiba ar tū simbolizej myusu dīnu paaudzis mieginuojumus izprast seņču pamastū montuojumu. Jī mieginoj vysu kū, lai atdzeivynuotu televizoru, bet napamona pošu byutyskuokū – televizors nav salyuzs, jam vīnkuorši nav signala. Videoklipa sižets aizdūd vaicuojumu – voi kulturys montuojums eistyn ir pagaiss, voi ari mes vīnkuorši vaira nazynim, kur i kai nūlaseit “signalus”?

Dzīsmis īrokstā pīsadalejuši Mareks Gusāns, Mārcis Lipskis i Gints Stankevičs. Dzīsmis īroksts taiseits Reigā, “Factory Sounds Studio” pi muzykys producenta Ginta Stankeviča.

Sovvaļnīks (eistajā vuordā Ingars Gusāns) ir latgalīšu muziks, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim.

Sovvaļnīka jaunū albumu “Cārtumi” var nūsaklauseit Spotify voi YouTube.

Albums “Cārtumi” izdūšonai tyka sagataveits ar Vaļsts kulturkapitala mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynuoja bīdreiba “Latgolys Producentu Grupa”. Albuma prezentaceja i vierīņs iz Sovvaļnīka dailradi nūtiks 2026. gods 25. septembrī Latgolys viestnīceibā “Gors” koncertā “Sovvaļnīkam – 18”.