Rokstu sagataveja: portals lakuga.lv

Septembris skaņ latgaliski – tai jaunū sezonu aizsuoc Latgolys viestnīceiba “Gors”, septembrī eipaši izceļūt latgalīšu volūdu, Latgolys kulturu i cylvākus. Kai informej koncertzālis puorstuovi, latgalīšu volūda tamā izskanēs kai izruodēs i koncertūs, tai stuostūs i dzīsmēs, programā īkļaunūt i nūtikšonys, kas radeitys latgaliski, i taidys, kurūs centrā ir Latgola i tuos cylvāki.

Septembrī vysaidom auditorejom paradzātuos nūtikšonys Latgolys viestnīceibā “Gors” skanēs latgaliski. Latgolys viestnīceibys “Gors” Muokslinīcyskuos dalis vadeituoja Ilona Rupaine stuosta: “Plānojūt jaunū sezonu, vysaidi apstuokli, sakriteibys i ari speciali īplānuotys nūtikšonys ir izveiduojušys septembri, kas skaņ latgaliski. Asu gondareita, ka latgalīšu volūda skaņ na viņ Latgolā radeitajā muzykā i stuostūs, tok ari teatru vīsizruodēs. Itymā mienesī pīsavērssim vairuokom spūdrom Latgolys personeibom, ituo gods jubilarim – myusu nūvadnīkim Ontonam Rupaiņam i Juoņam Streičam. Īspiejams, ka latgaliskuo septembra tradiceja varātu turpynuotīs ari iz prīšku!”  

6. septembrī Latvejis Leļu teatra izruode “Sunāns!” viesteis par Reigys Sunāna pīdzeivuojumim Latgolys laukūs. Izruode latvīšu i latgalīšu volūdā piec Laurys Meļnis i Viviannys Mariis Stanislavskys komiksa “Sunāns breiveibā” motivu ļaus mozajim skateituojim caur rūtaleigu stuostu īpazeit atškireigū i reizē ari meklēt tū, kas myus savīnoj.

Sovutīs 18. septembra muzykalais stuosts “Poema par O. R. Antonam Rupainim 120” pīsavērss nūzeimeigai Latgolys kulturys personeibai – Ontona Rupaiņa rakstnīka, pedagoga, dirigenta i sabīdryskuo darbinīka dzeivis ceļam i rodūšajim dorbim. Stuostu par jaunū školuotuoju, kurs ar velosipedu braucūt pa Latgolys celim, dybynuoja korus, īdvasmuoja cylvākus, organizēja dzīšmu svātkus, raksteja gruomotys, atkluos ituos šaļts Latgolys kulturys personeibys – Anna Rancāne, Māra Zaļaiskalns, Ināra Apele, Domeniks Slišāns, Ilona Rupaine, Mārcis Lipskis, MIKC Latgolys muzykys vydsškolys kors i Rēzeknis Tautys teatra akteri.

Vitala i humora pylna sūlejās byut komedeja “Mazpiļsāta 2”, kurā turpynuosīs stuosti par mozpiļsātys ļaudim i jūs attīceibom. Izruode latgalīšu i latvīšu volūdā “Gors” skateituojus prīcynuos 21. septembrī.

Latgolys byušona kluotyn septembra programā izskanēs ari vysaidūs koncertūs. Jau 5. septembrī “Gorā” gasteis TV3 šova “Koru kari” ituos sezonys uzvarātuoji – Daiņs Skutelis i Preiļu Purpura kors. Programā skanēs spūdruokī prīšknasumi nu šova, klauseituoju īmeiļuotys dzīsmis i jaunys muzykalys pērlis, kai ari gaidomi eipašī gosti i muzykali puorsteigumi. 25. septembrī ar eipašu koncertu atsagrīzs Sovvaļnīks. Tymā – dzīsmis nu juo īprīškejuo i jaunuo albuma. 26. septembrī Latgolys viestnīceibā “Gors” jau catūrtū godu piec kuortys izskanēs Aijis Rimšys dzīšmu koncerts. Dzīduotuoja, dzīsmineica i dzīšmu autore, kuru sauce par Latgolys Rūžeņu beja eistyna latgalīte – sovuos dzīsmēs jei muocēja kai ļustēt i smītīs, tai suopēt i rauduot.

Eipaša vīta septembra programā atvālāta ari Juoņa Streiča rodūšajam montuojumam. Gūdynojūt dyžuo latgalīša, kinu režisora, aktera i muokslinīka dailradi, 27. septembrī “Gors” aicynoj iz atraktivu i muzykalu komandu spēli, kurā dalinīki varēs puorbaudeit sovys zynuošonys par Meistara dzeivi i dailradi, kinom, muzyku, laikabīdrim i naaizmierstamajim kinu citatim. Tei byus na tik erudicejis spēle, tok ari vareiba kūpā atguoduot i nu jauna pīdzeivuot Streiča radeitū pasauli – ar humoru, dzīsmem i sasadzīduošonu. Pasuokumu vadeis Ēriks Zeps, par muzykalū pavadejumu ryupēsīs Mārča Lipska vadeituo instrumentaluo grupa, kai ari Rēzeknis i Rēzeknis nūvoda koru dzīduotuoji.