Rokstu sagataveja: portals lakuga.lv

Sastdiņ, 11. julī, suocūt nu 15 stuņžu, Rēzeknis nūvoda Lūznovys muižys teritorejā nūtiks muokslys i garšu festivals “Muokslys pikniks 2026”. Tei ir vīna nu spūdruokūs i apmaklātuokūs vosorys kulturys nūtikšonu, kas kasgadeji puorsteidz ar daudzveideigu programu. Ari itūreiz apmaklātuojus prīcynuos vysaidu muzykys žanru koncerti, cyrka i laikmeteiguos dejis izruodis, muokslinīku pleners, rodūšuos darbneicys i meistarklasis, byušūt ari vareiba laistīs garšu pīdzeivuojumūs, viestej “Muokslys piknika” organizatori – Lūznovys muižys rodūšuo komanda.

Muokslys piknika muzykys programā varēs dzierdēt latgalīšu etnodžeza ansambli “Bruoli i muosys”, kas apvīnoj jaunū Latgolys muziku energeju, džeza breiveibu i dzeivu tradicionaluos muzykys byušonu kluotyn. Ansambļa repertuarā sūpluok orginalkompozicejom skaņ ari interpretātys tautysdzīsmis, kurys nateik apsavārtys kai viesturyski eksponati, tok kai dzeiva i maineiga kulturys daļa. Sovpus trio “Even_Knows” ir storptautyskys muzykals dialoga lauks storp treis atškireigom personeibom, kurys vīnoj kūpeigs skots iz skaņu kai naīrūbežuotu telpu. Grupa izpylda originalmuzyku, vysu treis dalinīku kompozicejis, kuruos sasavyn personiskys muzykaluos volūdys i laikmeteiguo improvizaceja, padorūt katru uzastuošonu naatkuortojamu. Taipoš byus vareiba dzierdēt vysā jaunu indie grupu “Tante Gaida”, kurys muzyku raksturoj dzeivys melodejis, kas ļaun klauseituojim pīdzeivuot kai melanholiskys sajiutys, tai bohemisku trokuleibu. Taipoš grupys muzykā izaceļ daudzbaļseiba, kas sasavyn ar pošu raksteitū dzeju, indie-folk skaniejumā. Byus dzierdams ari vēļ vīns trio “Tikismikis” (Fraņceja), kurs iz skotivis atdzeivynoj Argentinys zīmeļu dinamiskū goru, izmontojūt boguoteigu vokala, gitarys i rytma sajaukumu. Sovpus nūslāgumā gaidoms grupys “Dabasu Durovys” koncerts.

Itūgod byus vareiba izbaudeit divejis laikmeteiguo cyrka izruodis – Eitis Magia (Argentina) un Cristián Ortiz (Spaneja). Eitis Magia ir aizraunūša vīna muokslinīka magejis i cyrka izruode, kurā nav vajadzeigi vuordi, kab radeit breinumainu sajiutu. Eitis spiej uzrunuot vysus skateituojus, naatkareigi nu tūs vacuma voi volūdys. Sovpus Cristián Ortiz puorstuov myusu dīnu cyrka muokslu, kur akrobatika, kusteibu teatris i vizualuo dramaturgeja saplyust vīnuotā muokslinīcyskā volūdā. Juo dorbi izaceļ ar fizisku virtuozitati, emocionalu dziļumu i vizualu izteiksmeibu, rodūt eipašus prīšknasumus, kas uzrunoj skateituojus puori volūdu i kulturu rūbežim.

Paraleli itom aktivitatem, sevkuram apmaklātuojam byus vareiba apsavērt Mihaila Stecjuka privatkolekcejis izstuodi “Retro sintezatori”, Inesis Elizabetis Brimerbergys gleznu izstuodi “Ziedos”, kurā atsakluoj daudzveideiguo zīdu estetika. Taipoš byus vareiba īpazeit Latgolys muokslineicu apvīneibys V.I.VA. pleneru i pop-up izstuodi muižys teritorejā.

Festivala mozuokajim apmaklātuojim byus vareiba ļautīs ceļuojumam pa bišu pasauli – Agatis Bankavys izruodē “Te, bite!”. Sovpus laikmeteiguos dejis izruode “Vērpete” aicynuos byut sūpluok doncuotuojim i kūpeigai izdzeivuot izruodis nūtikšonys, baudūt ari dzeivū muzyku vibrafonista Mārtiņa Milevska i gitarista Riharda Lībieša izpiļdejumā.

Kai stuosta vīna nu “Muokslys piknika” organizatoru, Lūznovys muižys kulturys projektu vadeituoja Inga Žirgule, itys ir desmitgadis “Muokslys pikniks”, kas nūruoda, ka itei tradiceja eistyn ir īsadzeivuojuse i cylvāki juos gaida. Pārņ kaids apmaklātuojs asūt sacejs, ka vosorys atvalinuojums suocās ar “Muokslys pikniku”. Itūgod festivalam ir diveji golvonī akcenti – jauneiba i latgaliskums. “Festivala desmitgadē asam izlykuši akcentu taišni iz latgaliskūs aktivitašu, kur koncertus suoks latgaliskais ansamblis “Bruoli i muosys” i nūslēgs “Dabasu durovys”, taipoš byus Silvestra Solovjeva dzejis performance, kur daļa tekstu byus latgaliski. Ūtrys akcents ir jauneiba, kam praktiski vysys muzykaluos apvīneibys, laikmeteiguos dejis puorstuovi i horeografi ir jaunīši,” tai Inga Žirgule.

Naiztryukstūši, sagaidūt festivalu, tiks kūrts ari muižys keramikys ceplis, kura izjimšona itūgod byus Ušpeļu saimis jaunuokuo keramika – Juma Ušpeļa – rūkuos. Kai īrosts, mozuokajim apmaklātuojim programā byus ari “Mārtiņa Burbuļi”, vysaidys rodūšuos darbneicys i nūdarbeibys, kur varēs dorbuotīs leidza, veiduot, zeimēt i cytaižuok izapaust.

Sūpluok muzykys i muokslys programom naatjamama sastuovdaļa byus ari garšu ceļuojums, kuru pīduovuos na tikai vītejī uzjiemieji, tok ari tuoluoki gosti. Pasuokumā varēs nūgaršuot lobus iedīņus i dzierīņus nu Latgolys mozūs ražuotuoju i uzjiemieju. Taipoš festivala apmaklātuoji teik aicynuoti jimt leidza sovus piknika grūzus ar gordumim, pledus i lobu nūskaņuojumu, kab nasteidzeigai pavadeit vosorys dīnu muižys teritorejā.

Beletus iz “Muokslys pikniku” var nūpierkt “Bilešu paradīzes” kasēs, škārsteiklā i Lūznovys muižā.