Rokstu sagataveja: portals lakuga.lv

Muziks Artūrs Uškāns aicynoj iz sovu lelū jubilejis festivalu, kas 31. oktobrī suoksīs Latgolys viestnīceibā “Gors”, 12. novembrī turpynuosīs Valmīrys kulturys centrā i 26. novembrī nūsaslēgs kulturys centrā “Ulbrokas Pērle”. Treis koncertūs iz skotivis kūpā ar jubilaru kuops ari juo draugi i kolegi.

Dzīduotuojis Ieva Akuratere i Brigita Reisone, aktrise Raimonda Vazdika, muziks Jurs Ostrovskis, gitaristu trio “A3” – Armands Alksnis, Armands Uozuoliņš (Ozoliņš) i Armands Varslavāns –, etnogrupa “Ogas”, grupa “Laimas muzykanti”, etnografiskais ansamblis “Vabaļis”, Reigys Stradiņa universitatis jauktais kors “Rīga”, pavodūšuo instrumentaluo grupa Matīsa Uškāna vadeibā – jī vysi ir Artūra Uškāna dzeivis i muzykaluos darbeibys laikā satyktī draugi i kolegi, kuri kūpā ar jubilaru kuops iz skotivis juo jubilejis koncertūs.

“Maņ itei jubileja nūzeimoj sasatikšonu ar draugim, klaueituojim, maņ meilim cylvākim i ar tim, kas mīļoj Latgolu. Gaidu vysus iz koncertim. Cīši gribīs redzēt daudzi cylvāku, kas pa itim godim klausejušīs munu myzyku, lai daleitūs ar jim. Koncertūs byus daudzi breineigu gostu, kurūs viņ ir vārts dzierdēt, ka i munys muzykys nasaklausa,” iz koncertim aicynoj jubilars.

Festivalā izskanēs dzīsmis, kurys muziks izpiļdejs LTV šovā “Pārdziedi mani!”, byus ari Uškāna raksteituos dzīsmis i tautysdzīšmu apdaris, pyrmatskaņuojumi i vysaidi nagaideiti puorsteigumi, kurūs vydā ari seņ īcarātais duets ar Raimondu Vazdiku. Pats jubilars koncertu muzykalū amplitudu raksturoj kai ceļu nu kora i opermuzykys da hardroka.

“Latgolys muzykys ūdzeņa, kū nikur cytur navar atrast, ir dabiskums. Ka maņ juoizalosa vīna dzīsme, kas vysulobuok raksturoj munu darbeibu muzykā, tei byutu “Vokors īt”. Itei dzīsme munā apdarē topa piec Monikys Zīlis dorba īstudātajai monoizruodei “Rūžys byudu golūs”, kur golvonū lūmu spieļuoja Maija Korkliša. Nu Margaritys Šakinys itei dzīsme tyka da mane. Niu vaira nav ni Monikys, ni Maijis, ni Margaritys, bet dzīsme vys vēļ dzeivoj. Sovulaik raidejumā “Dzintara dziesmas” jei beja lobuokūs dzīšmu vydā, tok pyrmatskaņuojumu pīdzeivuoja šovā “Dziedošās ģimenes”. Tei smeļdze, kas ir tamā dzīsmē, atstuoj īspaidu iz sevkuru cylvāku. Es jū dzīdoju koncertūs vysā Latvejā, i cylvāki jū dzīd leidza latgaliski,” tai Artūrs Uškāns.

Par tū, kas mainejīs i kas palics namaineigs jubilara dzeivē i muzykalajā ceļā, Artūrs soka tai: “Namaineigais munā dzeivē i muzykā ir vuiceišonuos. Vuiceišonuos periods maņ nav beidzīs da šam laikam, ari niu es vēļ vuicūs. Muzyka, kai i sevkurs muokslys vierzīņs, nav tei nūzare, kur var pasaceit, ka niu esi vysu īsavuicejs. Mes vysu laiku atsateistom, kai tehnologiski, tai rodūši. Sekojam leidza, kas nūteik pasauļa muzykā, apgiustam i ari pīlītojam. A maineigais ir dzeive. Mainuos i dzeivisvīta, i koncertiešonys vītys, nu kuo sastuov ari muzykanta biografeja.”

Beletus iz koncertim var nūpierkt ITE.