Rokstu sagataveja: portals lakuga.lv

Pārnejuo gods golā, taišni pyrma Zīmyssvātku, trio “Bille” publicēja jaunu dzīsmi – “Kur tu skrīsi, dūru pele”, bet itys gods īsasuocs na tik ar gataveišonūs “Supernovai”, bet ari eipašim īrokstim Leivuonā.

Trio “Bille”, par kurom portals lakuga.lv ir rakstejs vairuokys reizes, apsavīnuojušys dzīduotuojis i muzykantis Liene Skrebinska, Anna Patrīcija Karele i Katrīna Karele. Jau viestejom par apvīneibys minialbuma “Visu gadu dziesmas krāju” izīšonu (vaira ap albumu portala viestī ITE), bet pošā gods golā, taišni pyrma Zīmyssvātku, izguojs jauns trio skaņdorbs – dzīsme “Kur tu skrīsi, dūru pele”. Kai stuosta etnomuzykys dzīduotuoja, trio dalineica Liene Skrebinska, jei dzīsmi atroduse Latvīšu folklorys kruotivis digitalajā arhivā garamantas.lv, kod vajadziejs sasagataveit studeju aizdavumam. “Maņ beja vysā pateikams puorsteigums, kod atrodu itū dzīsmi, kam dūmuoju, ka arhivā asu jau izškūrstiejuse vysys maņ meiluos teiciejis Domicelys (Domicella, Domicelija) Līpenis (1901—1992) dzīsmis. Aranžeja dzīsmei roduos vīgli i par reizi beja skaidrys, ka mes ar trio “Bille” grybātu īdzīduot itū dzīsmi,” stuosta Liene.

Decembra vydā tyka paziņuoti ari Latvejis muzykys īrokstu goda bolvys “Zelta mikrofons” nominanti, kurūs vydā tautys muzykys nominacejā ar albumu “Visu gadu dziesmas krāju”, kurā skaņ i latgalīšu volūda, ir ari trio “Bille”. Liene soka, ka itei nominaceja saguojuse kai cīši jauka Zīmyssvātku duovona. “Nabejom gaidejušys, bet cīši prīceigi i pateikami, ka myusu dorbs ir nominantu vydā,” pīzeist Liene. Taipat niu apvīneibai prīškā gataveišonuos konkursam “Supernova”, kurā dzīduotuojis pīsadaleis kūpā ar izpiļdeituoju “The Ludvig”, dzīžūt skaņdorbu “Līgo”.

Tikū socialajūs teiklūs varēja redzēt, ka trio “Bille” gastej Leivuonā i tī tūp vairuoki jauni īroksti ari latgaliski. Kai portalam lakuga.lv izstuosteja Liene, tod itys ir specials dorbs Latvejis Universitatis deju ansambļam “Pērle”, kas pavasarī ar divejim koncertim – 26. aprelī i 9. majā – svieteis 15 godu jubileju. Speciali jubilejis koncertam tūp jauni dorbi, kam Aija Smirnova, kurei lobuok zynoma kai Leivuona nūvoda kulturys, turysma i sporta puorvaļdis vadeituoja, veiduojuse aranžejis. “Ansamblī “Pērle” struodoj horeografs Juris Gogulis, kurs jau ir sataisejs deju ar trio skaņdorbu “Vosora” nu pārņ izguojušuo minialbuma. Niu mums beja vareiba īdzīduot vēļ cytys dzīsmis gaidomajim koncertim i gasteit Leivuonā pi Aijis,” jaunumus atkluoj Liene Skrebinska. Da ituo popularitati izapeļnejušys J. Goguļa veiduotī videoklipi dejom “Simgalvis vecītis”, kurā īmyužynuota nu Sibirejis atvastuo dzīsme latgaliski (vaira ITE), kai ari “Laimas Muzykantu” dzīsmis “Meitu muote” horeografeja (vaira var izzynuot ITE).