Doncuotuoju videoklipā īmyužynuota nu Sibirejis atvastuo dzīsme “Sirmgalvis vecītis”

Doncuotuoju videoklipā īmyužynuota nu Sibirejis atvastuo dzīsme “Sirmgalvis vecītis”

Rokstu sagataveja: portals lakuga.lv

Maja golā videoagentura “Wind Films” dzeivisprīcys i kruosu pylnā videoklipā īmyužynuojuse i niu publiciejuse jau ūtrū dzīsmi-deju horeografeju latgaliski. Pārņ socialūs medeju lītuotuojus prīcynuoja “Laimas Muzykantu” dzīsmis “Meitu muote” horeografejis video, bet niu taidā formatā var nūsavērt nu Sibirejis atvastuos i piečuok apvīneibys “Sventava” īdzīduotuos dzīsmis “Sirmgalvis vecītis” horeografeju.

Deju, kurys horeografs ir Juris Gogulis, “Wind Films” klipā doncoj Latvejis Universitatis deju ansamblis “Pērle” i Reigys Ceļtnīceibys koledžys deju ansamblis “Austris”. Kai, nūviertejūt doncuotuoju iztureibu, nūruoda videoklipa veiduotuoji, tod videoklips Latvejis Etnografiskajā breivdobys muzejā fiļmāts pīcys stuņdis saulē i +27 gradu korstumā. Videoklipa režisori ir Juris Gogulis i Jānis Romanovskis, operatori Girts Ceriņš i Jānis Romanovskis, bet klipu kūpā montēja Jānis Romanovskis.

Dzīsme “Sirmgalvis vecītis” Māra Muktupāvela apdarē i apvīneibys “Sventava” izpiļdejumā īraksteita i publicāta 2020. godā izdūtajā albumā “Sibīrijas dziesmas”, bet dzīsmis originalverseja 2009. godā atvasta nu Sibirejis, kur jū filologejis ekspedicejai profesoris Lidejis Leikumys vadeibā dzīduojušys Antonina Šumilova i Anna Ručinska Ačinskys apleicīnē. Izdavuma “Sibīrijas latviešu dziesmas” (2009) daīmamajā video Antonina, dzīdūt dzīsmi, nūsmej, ka tamā sasajaukušys latvīšu i latgaļskuo volūdys.

Kai portalam TV3.lv pastuostejs horeografs Juris Gogulis, tod deja “Sventavys” dzīduotajai versejai radeita 2022. godā, gatavejūtīs Dzīšmu i Deju svātkim Minesotā ASV, bet dejis pyrmsuokumi meklejami 2020. godā, kod  Māris Muktupāvels paaicynuoja Goguli byut par horeografu-deju konsultantu “Sventavys” muzykys klipa fiļmiešonā. Kai pyrmū reizi ASV, tai i jaunajā videoklipā solista lūma dejā ir deju ansambļa “Pērle” muokslinīcyskajam vadeituojam Raimondam Dzintaram. Horeografejā “Sirmgalvis vecītis” sasavyn divejis paaudzis – aizguojušī laiki i tagadne: jaunīši simbolizejūt siermgaļvu īškejuos sajiutys – jauneibys maksimalismu ar vysu juo energeju, bet videoklipa režisors izsver, ka deja cytu vydā izaceļ ar humoru i dzeivisprīcu.


Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]