Rokstu sagataveja: portals lakuga.lv

Dzīsmineica Laura Bicāne i muziks, grupys “Dabasu Durovys” liders Arņs Slobožanins nūdavuši klauseituoju viertiejumam sovu jaunuokū kūpdorbu “Dīvs puorraksteis”, informej poši dzīsmis autori i izpiļdeituoji.

Laura Bicāne nūruoda, ka dzīsme ir par realū dzeivi – par gaidom i iznuokumu, par uzticeibu i nūdeveibu. “Reizem navar lītys pagluobt kuortejais “īluops” i ir juoaiztaisa aiz seve durovys. I juosalīk vysa cereiba uz augstuokim spākim, kai tū nūruoda dzīsmis nūsaukums, kas ir ari golvonuo viests,” tai Laura.

Dzīsmis īroksts taps sadarbeibā ar Baļtinovys jauktū kori (vadeituoja Aija Nagle). Laura i Arņs ir jau agruok radejuši kūpejis muzykaluos kompozicejis. “Maņ cīši pateik Arņa raksteitī teksti. Tī ir vīnkuorši i geniali. Pīmāram, itai dzīsmei tekstu sarakstejom kūpejim spākim. Taipat uztycu Arņam īroksta instrumentaceju. Ir lels gondarejums i prīca prezentēt kuortejū pošu radeitū muzyku – par speiti muoksleiguo intelekta progresam”, tai ar smaidu sejā soka Laura.

Dzīduotuoja Laura Bicāne (niu eistajā vuordā Laura Gutjeresa-Kamačo) jau vairuokus godus dzeivoj Vuocejā, vystik turpynoj nūsadorbuot ar muzyku, tymā skaitā dzīd i sacer dzīsmis latgaliski. Vaira par Laurys dzeivi var izzynuot portala lakuga.lv intervejā ar jū ITE. Sovutīs Arņs Slobožanins kasdīnā turpynoj muzicēt ar grupu “Dabasu Durovys”, kas itūgod klauseituojim pīduovuoja jaunu dzīsmi “Alkimeja”.