Marka Rotko muoksla i sugestejūšuo personeiba vys vēļ roda rezonansi sabīdreibā. Juo filozofiskajūs i rodūšajūs mekliejumūs dzymušuo ideja par kruosu laukumu gleznīceibu raisa emocejis, redzīņus i attīksmis. Nanūlīdzama ir juo unikalitate i pasauļa muokslys viesturē īraksteitais vuords, kas leidz Daugovpilei atvad naskaitamus muokslys profesionaļus i interesentus. Geneja muoksla i vide, kur nu bierneibys ir veiduojusēs juo personeiba i lykti izgleiteibys pamati, vīnoj ari muokslinīkus, kuri Daugovpilī dzeivoj i struodoj šudiņ. Rotko centrs ir palics par platformu na tik storptautyskim muokslys projektim, tok ari regiona muokslinīku izstuodem, kur jūs veikums teik eksponāts sūpluok pasauļa leimiņa muokslai.

Līcynojūt par Daugovpiļs muokslinīku profesionalū muokslu i jūs saikni ar muokslys geneja Marka Rotko vuordu, nu 26. apreļa leidz 1. juņam Daugovpiļs Dizaina i muokslys vydsškolys “Saules skola” jaunajā korpusā byus pīejama izstuode “Cilvēks. Ģēnijs. Daugavpils”. Izstuodē byus apsaverama Daugovpilī dzymušuo muokslinīka Sigurda Vīdzirkstis dorbu sereja, Silvys Linartis rodūšais montuojums, 20. g. s. 70. godu Daugovpiļs muokslinīku grupys dorbi i jaunuokuos muokslinīku paaudzis rodūšī mekliejumi nu Rotko centra gleznīceibys kolekcejis.