Marka Rotko originaldorbu atkluošona
Apreļs Rotko muzeja kalendarā vysod bejs svātku mieness. Pyrma 11 godu Daugovpiļs cītūksnī tyka atkluots Rotko muzejs (tūreiz – Rotko centrs) – daudzfunkcionala muokslys i kulturys instituceja, kas kardinali maineja piļsātys vaibstus, īzeimejūt Daugovpili kai strategisku vītzeimi Latvejis kulturkartē.
Itūgod, atzeimejūt Rotko muzeja 11. godadīnu, sūpluok pasauļslovonuo muokslinīka Marka Rotko originaldorbu ekspozicejai, kurā apsaverama treis godu deponiejumā nūdūtu gleznu izlase nu muokslinīka bārnu privatkolekceju, tiks atkluoti vēļ diveji originaldorbi – muokslinīka meitys Keitas Rotko Prizelys duovynuojums Rotko muzeja kruojumam, pasnāgts kulturvītys 10 godu jubilejis svineibuos pārnejuo gods pavasarī. Itī muokslys dorbi – autora agreimuo dailradis perioda zeimiejumi ūglis tehnikā – ir itūšaļt vīneigī Marka Rotko originaldorbi Latvejis muzeju kruojumā.
Papyldus originaldorbu atkluošonai pasuokumā tiks prezentāti ari aktualuos izstuožu sezonys katalogi. Tūs vydā ir izcyluos muokslineicys, spūdrys latvīšu laikmeteiguos gleznīceibys puorstuovis Frančeskys Kirkis katalogs personalizstuodei “Bastions”, Latgolys regiona muokslinīku konkursa izstuodis “Lielgabalu klusumā” tvārums ar 47 muokslinīku dorbim i Purvīša bolvys 2024 nominanta Romāna Korovina personalizstuodis “Nomirsim kopā” katalogs.
26. aprelī nu 16.00 stuņžu Rotko muzeja pastuoveiguo ekspoziceja ar kruojuma izstuodi i Marka Rotko originalim apsaverama bez moksys.