Preiļūs i Reigā Juoņa Streiča 90. jubileju atzeimuos ar eipašu koncertizvadumu, kas veiduots piec poša režisora īceris. Izvaduma režisore ir juo meita Viktorija Streiča-Jakštiene, bet tymā pīsadaleis Streiča kinu akteri, tymā skaitā Gundars Ābuoliņš (Āboliņš) i Artūrs Skrastiņš, kurī veiduos stuovizruožu styla sarunu ar cytim akterim par Streiča “metodi” i juo Aizekranejis pasauli. Streiča kinuos nūzeimeiga lūma ir muzykai, kurū veiduojuši izcyli Latvejis komponisti i kas napylda tik ilustrativu funkceju, bet palīk par nūzeimeigu dramaturgisku i filozofisku elementu. Koncertizvadumā izskanēs 15 dzīsmis nu juo kinu, kurys jaunā i laikmeteigā aranžejā puorvārtušys grupys “The Sound Poets”, “Kautkaili” i “Carnival Youth”. Taipat iz ekrana kluotyn byus ari pats Juoņs Streičs. Koncertizvadums īcarāts kai dzeivisprīceigs veļtejums režisoram, juo dailradei i vierteibom, kas savīnoj vysaidys paaudzis. Itys projekts ir pādejais lelais Streiča režejis dorbs, kurū jis uzticiejs eistynuot da gola. Koncertizvadumu 19. septembrī varēs redzēt Preiļu parka estradē, bet 26. septembrī Reigā, kinys teatrī “Splendid Palace”. Beletus iz koncertizvadumim var atrast ITE.