2. oktobrī 16 stuņdēs Rotko muzejs atkluos apjūmeigu muzeja kruojuma izstuodi “Tuvplāns: dvēsele”, atruodūt da šam cīši naeksponātus Latvejis i uorvaļstu muokslinīku dorbus gleznīceibā, grafikā, keramikā, fotografejā i videomuokslā. Izstuode papyldynuos muzeja pastuoveigū ekspoziceju da 2028. gods oktobra.

Izstuodis dorbu izlasi vīnoj cylvāka byuteibys izpiete – tūs centrā ir cylvāks kai kerminiska, racionala, emocionala i goreiga byutne. Sūpluok portretam kai daudzsluoņainai identitatis konstrukcejai apsaverami traumatisku atmiņu, subjektivuos pīredzis i zamapzinis dzeiļu tvārumi figuralajā muokslā, abstrakcejuos i konceptualūs autordorbūs.

Latvejis muokslys ainu spūdrai īzeimoj Ieva Iltnere, Rasa Jansone, Ilona Romule, Mikelis Fišers, Romāns Korovins i Jānis Mitrēvics, kai ari trymdys muokslinīki Daina Dagnija i Aleksandrs Karpovs. Puorstuovāti ari vysaidu paaudžu uorvaļstu muokslinīki, tymā skaitā muzeja reikuotūs storptautyskūs simpozeju i konkursu dalinīki – Džoja Kloumena (Joy Kloman, ASV), Jannis Anastasiu (Ioannis Anastasiou, Grīkeja), Joanna Mankeviča (Joanna Mankiewicz, Pūleja) i cyti.

Pyrmū reizi Rotko muzeja kruojuma izstuodē dialogā ar laikmeteiguos muokslys dorbim mierktīceigai puorstuovātys regiona kulturviesturis vierteibys nu muzeja jaunuos strukturvīneibys – Daugovpiļs muzeja – muokslys kolekcejis. Latgolys vītu Latvejis muokslys viesturē izstuodē īzeimoj Maija Bērziņa, Mārtiņš Zitmanis i Ivo Folkmanis.

Reizē ar jaunū kruojuma izstuodi muzejs atkluos 22. storptautyskuo gleznīceibys simpozeja “Mark Rothko 2026” dalinīku dorbu izstuodi, kai ari Rotko klasiskuo perioda gleznīceibai veļteitu multimedialu “Klusuma telpu” i atjaunuotū muokslinīka dzeivis guojuma ekspoziceju.