Storptautyskuo Rakstnīku i tulkuotuoju sāta, Latvejis Rakstnīku savīneiba i Latvejis Literaturys centrs aicynoj pīsaceit autoru dorbus Latvejis Literaturys goda bolvai 2012. Dorbus viertēs i gūdalguos itaiduos kategorejuos: lobuokuo dzeja, lobuokuo proza, lobuokuo Latvejis autora originalliteratura bārnim, lobuokais uorvaļstu literaturys tulkuojums latvīšu volūdā, sylgtuokuo debeja literaturā. Teik gaideiti ari pīsacejumi kategorejā “Myuža īguļdejums Latvejis rakstnīceibā”.

Bolvys ekspertu komisejā struoduos deveni nūzaris profesionali: rakstneica i tulkuotuoja Maira Asare, literaturkritike Anda Baklāne, dzejneica Ērika Bierzeņa, literaturzynuotnīks Pauls Daija, literaturkritike i tulkuotuoja Īva Kolmane, dzejneica Liāna Langa literaturzynuotnīks Juoņs Ūzuleņš, rakstneica Dace Rukšāne-Ščipčinska, tulkuotuoja Mudeite Treimane.

Eksperti izviertēs 2012. goda davumu Latvejis rakstnīceibā, kotrā nu kategoreju nominejūt literari augstvierteiguokūs 2012. godā publicātūs dorbus, kas tiks gūdynuoti Latvejis Literaturys goda bolvys pasnīgšonys ceremonejā, kas nūtiks 2013. goda aprelī.

“Lakuga” atguodynoj, ka pārņ latgalīšu dzejnīka Valentina Lukaševiča dzejūļu kruojums “Bolti burti” (LKC izdevnīceiba) īgiva specialu bolvu kai nūzeimeigs nūtykums Latvejis rakstnīceibā. Sarunu ar autoru skaiti ite. Vaicuojumus par bolvu, par volūdom, par legendom i raksteišonu aizdūd dzejis skaitejumu klauseituoji.

Rakstnīks Pauls Bankovskis ekspertu komisejis izvēli itam kruojumam pīškiert specialu bolvu komentēja: “Fakts, ka latvīšu literaturys specialajai bolvai izvierzeits dzejis kruojums latgalīšu volūdā, varātu izavērt piec politiska žesta – kai nikai diskusejis par latgalīšu volūdu, juos statusu i vītu nanūrymst ni reizis. Itys gadīņs tūmār nav čiuliska gribiešona izruodeit politisku toleraņci voi izruodeit sovu latgalofileju. Lukaševica panti ruoda, ka volūda ir tik dzeiva, cik dzeiva ir gribiešona jū lītuot – ari dzejā, ari modernā, 21. godu symtam atbylstūšā dzejā.”

Pīsacejumi ir juoīsnīdz Latvejis Literaturys centrā, Reigā, Pērsis īlā 14-8, dorba dīnuos nu 10 leidz 16 stuņžu leidz 2013. goda 4. februaram, pa prīšku pīsasokūt pa teleponu 67311021 voi e-postu centre@literature.lv. Pīsacejumi īsnīdzami breivā rakstiskā formā, kluot dalīkūt divejus dorba izdavuma eksemplarus.

Latvejis Literaturys goda bolvys 2012 nūlykumu var puorskaiteit sātyslopuos www.laligaba.lv, www.literature.lv, www.rakstnieciba.lv i www.ventspilshouse.lv.

Latvejis Literaturys goda bolva ir nūzeimeigs goda nūtykums literaturys nūzarē Latvejā. Tradiceja kasgods izvierteit literarūs dorbus i pīškiert bolvys īsasuokuse 2001. godā. Itū bolvu var skaiteit par profesionaluokū nūviertejumu i atzineibu izciluokajim dorbim, kas goda laikā izguojuši Latvejis rakstnīceibā – taišni pošim autoru dorbim i jūs literarajai kvalitatei, na izdavumim i jūs nūformiejumam. Nu 2010. goda par bolvu guodoj Latvejis Rakstnīku savīneiba, Storptautyskuo Rakstnīku i tulkuotuoju sāta, Latvijas Literatūras centrs i Latvejis Literaturys centrs.

Valentins Lukaševičs skaita dzeju Latvejis Literaturys goda bolvys dzejis nominacejis autoru skaitejumūs Reigā 2012. goda 18. aprelī. Nu Lakugys arhiva.