Rokstu sagataveja: portals lakuga.lv

15. junī 10.30 stuņdēs Krustpiļs nūvoda Atašīnis kulturys nomā (Cereņu īlā 1) Latvejis Arheologu bīdreiba (LAB) piec franču kolegu īruosynuojuma aicynoj iz pyrmū Arheologejis dīnu. Projekta ītvorūs nu 12. juņa nūtiks arheologiskī izrokumi Atašīnis piļskolnā. Dr. hist. Jura Urtāna vadeibā jimūs pīsadaleis 8 jaunīši i nu Atašīnis apleicīnis, i puorejuos Latvejis, informej projekta autore i koordinatore, LAB vaļdis sekretare Rūta Vecmuktāne.

Arheologejis dīnys mierkis ir īpazeistynuot plašuoku sabīdreibu ar arheologejis zynuotni i padareit jū saprūtamuoku i daīmamuoku. Dīnys pyrmajā daļā tiks nūlaseitys četrys lekcejis par arheologeju, juos vysaideibu i kluotasameibu.

Dīnys ūtruo daļa nūtiks Atašīnis piļskolnā, kas itūgod ar sovu naparostū viesturi ir izalaseits par Arheologejis goda pīminekli. 13.30 stuņdēs piļskolna apmekliejums suoksīs ar izrokumu vadeituoja stuostu par piļskolnu i izrokumim, piec tuo paradzātys treis meistarklasis. Sevkuram interesentam byus vareiba paraudzeit spriesšonu ar vuorpsteņu, apsavērt i izvaicuot Kroma kolna bruolistis bīdrus par senejom latgaļu rūtom, īrūčim, paražom, kai ari guņskurā iz kūceņa cept maizeiti. Apmaklātuojim byus ari rata vareiba pagaršuot guņskurī, muola pūdā, vyrtu putru.

Pasuokuma nūslāgumā, 16.00 stuņdēs, vysi piļskolna gosti varēs baudeit folklorys draugu kūpys “Trejasmens” uzastuošonu.

Īeja pasuokuma obejuo daļuos ir bez moksys.