Aicynoj iz lekceju par latvīšu i latgalīšu volūdys atškireibom gramatikā

Aicynoj iz lekceju par latvīšu i latgalīšu volūdys atškireibom gramatikā

Roksta autors: portals lakuga.lv

Svietejūt sovulaik Latvejis Universitatē (LU) dybynuotuos Baltu filologejis nūdalis symtgadi, trešdiņ, 7. aprelī, LU Latvistikys i baltistikys nūdaļa aicynoj iz lekceju par latvīšu i latgalīšu volūdys atškireibom gramatikā – viestej informaceja nūdalis socialajūs teiklūs.

1921. godā latvīšu volūdnīks Jānis Endzelins LU nūdybynuoja Baltu filologejis nūdaļu i sataiseja attīceigu studeju programu – tei tūlaik pasaulī beja pyrmuo i vīneiguo nūdaļa i studeju programā, kurymā studēja i pieteja latvīšu i cytys baltu volūdys, latvīšu literaturu i folkloru. Myusu dīnuos situaceja ir pasamainejuse – latvīšu volūdu, literaturu i folkloru ir vareiba studēt ari cytuos vaļstīs – kai atsevišku studeju kursūs, tai pastuoveiguos programuos.

Svietejūt ituos nūtikšonys symtgadi, LU Humanitarūs zynuotņu fakultatis Latvistikys i baltistikys nūdaļa reikoj lekceju cyklu “Latvistika – pasaules skatījums”, kurymā uorzemu augstškolu vuiceibspāki stuosta par sovim pietejumim i ari par tū, kai jūs universitatē nūteik studejis latvīšu volūdā i literaturā. Trešdiņ, 7. aprelī, sešuos stuņdēs vokora lekceju cyklu atkluos Adama Mickeviča universitatis Poznaņā (Pūleja) profesore Nikole Naua ar lekceju “Latvīšu i latgalīšu volūdys atškireibys gramatikā”. Nūtikšonu vadeis LU profesore Lideja Leikuma.

Lekceja byus nūsaverama Latvistikys i baltistikys nūdalis lopā socialajā teiklā Facebook ITE.

Portala lakuga.lv interveju ar profesori Nikoli Nauu, kurei, byudama vuocīte i dzeivuodama Pūlejā, pietej latgalīšu volūdu, var puorskaiteit ite: https://www.lakuga.lv/2018/10/26/byudama-vuocite-bet-dzeivuodama-puleja-nikole-naua-pietej-latgalisu-voludu/

Lekcejis īroksts nūsaverams ite:

Print Friendly, PDF & Email

Nūtikšonu kalendars

Apr
14
Tre
12:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
Apr 14 @ 12:00 – May 8 @ 18:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv