Reigys pilī atkluots veiskupa Jezupa Rancāna portrets

Reigys pilī atkluots veiskupa Jezupa Rancāna portrets

Rokstu sagataveja: portals lakuga.lv

14. novembrī, Vaļsts prezidenta institucejis 100. godadīnā, Reigys pilī svineigai atkluoti muokslinīka Rituma Ivanova gleznuotī Vaļsts prezidenta vītys izpiļdeituoju Paula Kalniņa (1944–1945) i Jezupa Rancāna (1947–1969) portreti, viestej publiski daīmamuo informaceja.

“Šudiņ, prezidenturys symtgadē, mes eipaši gūdynojam Dr. Paulu Kalniņu i veiskupu Jezupu Rancānu, Vaļsts prezidentu galereju papyldynojūt ar div jaunim portretim. Tys leidz itam varbyut nav bejs plaši zynoms, tok Vaļsts prezidentu viesturis linejis teciejumu napuortrauce padūmu okupaceja,” saceja Vaļsts prezidents Egils Levits, nūruodūt, ka storp Kārli Ulmani i Gunti Ulmani, Latvejai asūt okupātai, jī piļdeja Vaļsts prezidenta omota pīnuokumus trymdā.

Vaļsts prezidents atzeimēja, ka nūzeimeiga lūma vaļstiskuma turpynuošanā i naatkareibys atjaunuošonā beja kai Nacionaluos pretuošonuos kusteibai, tai Latvejis Centralajai Padūmei, Vaļsts prezidenta vītys izpiļdeituojim i Latvejis diplomatim: “Kab vaļsti i prezidenturu varātu atjaunuot, vysapyrma tū vajadzēja nūturēt. Tī beja vajadzeigs i Latvejis Centraluos padūmis 1944. gods 17. marta memorands, i 1944. gods 8. septembra Deklaraceja par Latvejis vaļsts atjaunuošonu, i 1948. gods 13. marta/3. apreļa trymdā topušais Latvejis Senata senatoru atzynums, i daudzys cytys lītys, kurys Latvejai dareja Pauls Kalniņš i Jezups Rancāns.”

Latvejis okupaceju, kū prettīsiskai eistynuoja PSRS, naatzyna ni Latvejis tauta, ni storptautyskuo kūpīna. Vysus okupacejis godus Latvejis vaļsts turpynuoja pastuovēt de iure kai storptautyskūs tīseibu subjekts. Itymā laikā uorvaļstīs napuortraukti turpynuoja struoduot Latvejis diplomatiskais i konsularais dīnasts, kas izsaceja Latvejis vaļsts poziceju i aizstuovēja Latvejis pylsūņu interesis. Atbylstūši Satversmei i Saeimys kuorteibys ruļļam Vaļsts prezidenta vītys izpiļdeišona beja Saeimys prīšksādātuoja (juo byušonā paceli – Saeimys prīšksādātuoja bīdra) pīnuokums. Pādejais Saeimys prīšsādātuojs Pauls Kalniņš i juo bīdrys Jezups Rancāns atbylstūši Satversmei seceigai uzajēme Vaļsts prezidenta omota pīnuokumu piļdeišonu, uzturūt praseibu piec Latvejis naatkareibys i Satversmē nūsaceituos demokratiskuos vaļsts īkuortys atjaunuošonys.

Vaira par Jezupu Rancānu var skaiteit ITE

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]