Rokstu sagataveja: portals lakuga.lv

Par reizi piec Leldīnis svātku laika Latgolys regiona atteisteibys agentura (LRAA) izsludynuojuse Vaļsts kulturkapitala fonda (VKKF) mierkprogramys “Latvīšu viesturiskūs zemu atteisteibys programa” Latgolys kulturys programys 2023 regionalūs kulturys projektu konkursu. LRAA tīseibys administrēt ari ituo gods kulturys programys konkursu dabuojuse konkursa kuortā, kura rezultatus VKKF publiciejs ituo gods 11. aprelī.

Jau īprīšk viesteits, ka pārnejuo gods gols atguoja ar naskaidreibom par īrostūs regionalūs kulturys programu projektu konkursu byušonu iz prīšku, kod vaļdeiba pījēme lāmumu pameit da ituo pastuovūšū programu finansiešonys modeli nu A/S “Latvijas valsts meži” atbolsta iz puorlikšonu iz vaļsts budžetu. Leidza ar itom izmaiņom, izmainis skar ari programys saturu i ītekmej projekta eistynuotuoju dorbu, par pīmāru, projektu eistynuošonu varēs suokt mienesi vāluok nakai bejs īprīšk i ari pats projektu sagataveišonys laiks ir daudzi eisuoks – viņ divejis nedelis. Vaira par situaceju par programys finansiejumu i procesu varēja skaiteit ITE.

Golvonais VKKF mierkprogramys jaunums ir tuos finansiešonys modeļa i nūsaukuma maiņa – niu tei ir kai atbolsts taišni latvīšu viesturiskūs zemu kulturys atteisteibai, kas paradz, ka ir na četrys, bet pīcys regionaluos programys atbiļstūši Latvīšu viesturiskūs zemu lykuma dalejumam – pyrmū reizi sova regionaluo kulturys projektu programa byus ari Sielejis viesturiskajai zemei. Ari projektu eistynuotuojim itam vajag dagrīzt viereibys, ka projekti itūgod nav īsnādzami atbiļstūši plānuošonys regionu rūbežim, bet saskaņā ar viesturiskūs zemu rūbežim.

Tok programys mierkis Latgolā palics taids pats kai da ituo, respektivi, tys paredz veicynuot kvalitativa i daudveideiga kulturys pīduovuojuma daīmameibu sabīdreibai i jaunradi Latgolā i veicynuot Latgolys kulturys daudveideibys saglobuošonu i atteisteibu.

Projektu dasacejumus Latgolys kulturys programā 2023 pījem nu 11. da 28. apreļa (īsnēgšonys termeņš 28. apreļa 23.59) papeira ci elektroniska dokumenta formā. Pošu projektu eistynuošonys laiks itūgod ir nu 26. maja da 15. decembra, bet atskaitis projektu programys administratoram juoīsnādz da 22. decembra. Vysa informaceja par programu i tuos nūlykums atrūnams ITE.

Kūpejais itūgod Latgolys kulturys programys eistynuošonai daškiertais finansiejums ir 200 tyukstūšys eiro, kas paradzāti kai programys administriešonai, tai projektu eistynuošonai.  

Kab veiksmeiguok pīsadaleitu projektu konkursā i saprastu vysys naskaidreibys, ka taidys ir, 18. aprelī 13 stuņdēs LRAA aicynoj iz informativu seminaru par projektu konkursu “Zoom” platformā ITE.

Atguodynuosim, ka Latgolys kulturys programa paradz atbaļsteit projektus, kas paradz:

• kvalitativys muokslys i kulturys daīmameibys nūdrūsynuošonu Latgolā;
• Latgolys kulturys daudzveideibys izzynuošonu, saglobuošonu i atteisteibu;
• ar Latgolu saisteitu jaunradi;
• tradicionalūs zynuošonu i omotu prasmu saglobuošonu, prakstiziešonu, dokumentiešonu, izpēti, populariziešonu, i puornesi, kai ari tūs integraceju turisma aktivitatēs;
• bārnu i jaunīšu īsaisti kulturys projektu aktivitatēs i rodūšajūs procesūs;
• kulturys darbinīku, amatnīku kapacitatis ceļšonu (seminari, pīredzis apmaiņa, apvuiceibys i c.)
• Latgolys, tuos kulturtelpys i nūvodu sovpateibu paruodūšu i popularizejūšu pasuokumu nūdrūsynuošonu;
• ar latgalīšu rokstu volūdys praktiziešonu i populariziešonu saisteitu iniciativu i projektu eistynuošona;
• daudzu godu kulturys periodikys izdavumu izdūšonu latgalīšu rokstu volūdā.

Taipat itūgod projektu īsnīdziejim ir jaunums projekta dasacejuma anketā – juonūruoda projekta mierkis, voi tys paradz kvalitativys i daudzveideibys kulturys daīmameibu latvīšu viesturiskajuos zemēs voi Latgolys sovpateibys izzynuošonu, saglobuošonu i populariziešonu.

Ar pārn programā eistynuotajim projektim var īpasazeit ITE.