Latgaliskajam serialam “Fati” jau itūgod byus ūtrei sezona

Latgaliskajam serialam “Fati” jau itūgod byus ūtrei sezona

Rokstu sagataveja: portals lakuga.lv

2022. gods golā pyrmizruodi pīdzeivuoja pyrmais i itūšaļt vīneigais televizejis serials latgaliski “Fati”. Niu, kai viestej seriala producents Arņs Slobožanins, ir apstyprynuots, ka serialam jau ītogod byus 2. sezona.

Vaira par seriala “Fati” ideju, tapšonys procesu i īsaisteitūs cylvāku sajiutom pyrmuos sezonys fiļmiešonys laikā portals Lakuga.lv stuosteja rokstā ITE i piec pyrmizruodis ITE. Atguodynojam, ka seriala nūsaukums aizajimts nu Ingys Ābelis romana “Klūgu mūks” i vuorda skaidruojums varātu byut – cylvāki, kas ir jauni, glupi i panaivi.

Kai par sevkura veida muokslys dorbu, ari par “Fatim” recenzejis i atsauksmis dalejuos – beja ļauds, kuri slavēja i saceja viņ lobus vuordus, beja ari taidi, kuri veļteja skorbuoku kritiku, vystik “Fati”, sajemūt ari Latgalīšu kulturys goda bolvu “Boņuks 2022”, atzeits par svareigu nūtikšonu latgaliskajā kulturtelpā pārņ kai cikom kas vīneigais televizejis serials latgaliski.

Seriala 2. sezonys tapšonu finansiali atbolsta SIA “Tet”, Latvejis Televizeja i mecentats Pīters Ragaušs. Interesanti, ka itūreiz golvonais investors ir SIA “Tet” i, kai pastreipoj seriala producents Arņs Slobožanins, tys paruoda, ka ari “Tet” serialu skaita par veiksmeigu komercprojektu.

SIA “Tet” sabīdryskūs attīceibu specialiste Laura Jansone pastreipoj, ka serials izklaidis platformā Tet TV+ sajiems lelu atsauceibu, deļtam sadarbeibys turpynuošona ar bīdreibys “Latgolys Producentu Grupa” puorstuovim Arni Slobožaninu i Gunti Rasimu beja viņ lykumsakareiga.

Arņs ari stuosta, ka 2. sezona byus kai turpynuojums pyrmajai: serials suoksīs ar vuiceibu goda nūslāgumu, kur golvonī varūni – Pīters i Vitaļs – gataveisīs vosorys breivlaikam. Seriala darbeiba nūtiks laukūs, kur obeji školuotuoji byus nūbraukuši atsapyust, vystik lela atpyuta nasaīs, partū ka suoksīs vysaiduoki pīdzeivuojumi.

Ari 2. sezonā golvonajuos lūmuos palīk akteri Ritvars Gailums, Māris Korsiets, Kristīne Veinšteina, tok leluokuo daļa rodūšuos komandys pasamaineis – niu seriala režisors byus Edvards Mikāls, operators Raivo Freimanis, bet skaņu režisors Armands Treilihs.

Itūšaļt nūteik gataveišonuos dorbi, ari tryukstūšuo finansiejuma mekliešona i puorrunys ar investorim. Scenarejs ir gotovs, ari jaunuo komanda ir nūkomplektāta. Seriala 2. sezonys fiļmiešona nūtiks Ludzys nūvoda Kuorsovys pusē nu 21. augusta da 1. septembra, sovpus iz ekranu serialu varim gaideit tyuļuok decembram. Nu suoku serials byus radzams kinuteatrūs, tod “Tet” platformā i aptyvai iz Latgalīšu kulturys goda bolvys “Boņuks 2023” laiku, marta suokumu, ari Latvejis Televizejā.

Print Friendly, PDF & Email

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]