Nu napatīsu apsyudzeibu da nagaideitu atrysynuojumu – gaidoma seriala “Fati II” pyrmizruode Rēzeknē

Nu napatīsu apsyudzeibu da nagaideitu atrysynuojumu – gaidoma seriala “Fati II” pyrmizruode Rēzeknē

Rokstu sagataveja: portals lakuga.lv

Kaidu šaļti īprīšk portals lakuga.lv stuosteja, ka Ludzys nūvoda Kuorsovys pusē teik fiļmāta pyrmuo seriala latgaliski “Fati” ūtruo sezona, par kū vaira skaiti ITE. Niu publicāts seriala treilers i 23. novembrī Rēzeknē, Latgolys viestnīceibā “Gors”, gaidoma seriala pyrmizruode.

Seriala treilers ir pyrmuo īsavieršona seriala ūtruos sezonys nūtikšonuos, kuruos turpynuosīs obeju golvonūs varūņu – školuotuoju Pītera i Vitaļa – pīdzeivuojumi. “Fatu” ūtrajā sezonā sūpluok profesionalajim akterim Ritvaram Gailumam, Mārim Korsietim, Kristīnei Veinšteinai serialā nūsafiļmiejs ari akters Juoņs Krūņs,

“Niu nūteik lelī montažys dorbi, daudzi jau ir padareits, tok vēļ vaira dorbu ir prīškā. Piec tam suoksīs sleipiešona, kas aizjims vēļ vaira laika nakai pyrmuo montaža, sovpus tod byus skanis apstruode i kruosu reguliešona. Dorba vēļ cīši daudz, tok kūpumā sajiutys ir lobys!”, stuosta seriala producents Arņs Slobožanins.

Ūtrajā seriala sezonā turpynuosīs seriala golvonūs varūņu, školuotuoju Pītera i Vitaļa, pīdzeivuojumi. Obeji svieteis vosorys atvalinuojuma suokšonūs, izdūmojūt braukt da rodu iz Buozovu i pīsapeļneit vosorys dorbūs. Školuotuoji teik izmytynuoti cīmā pazeistamuo, bet niu jau myužeibā nūguojušuo bitinīka Modesta sātā. Izbaudeit vosoru dzeraunē atbrauc ari Pītera sīva Anna. Vysi treis teik īrauti nasaprūtamūs i mistyskūs nūtykumūs, kas ni pa jūkam satrycynoj vītejū ļaužu kasdīnu. Seriala ūtrajā sezonā byus cylvāka nūlaupeišona, napatīsa apsyudzeiba, publiska kaunynuošona i taipat nagaideits atrysynuojums.

Ari seriala ūtrei sezona sovu pyrmizruodi pīdzeivuos iz leluo ekrana – tū 23. novembrī Rēzeknē, Latgolys viestnīceibā “Gors”, var nūsavērt kotrys grybātuojs. Pyrmizruodē byus vareiba sasatikt ar seriala rodūšū komandu. Beletus iz nūtikšonu var nūpierkt ITE.

Vaira par seriala “Fati” ideju, tapšonys procesu i īsaisteitūs cylvāku sajiutom pyrmuos sezonys fiļmiešonys laikā latgalīšu kulturys ziņu portals stuosteja rokstā ITE i piec pyrmizruodis ITE. Atguodynojam, ka seriala nūsaukums aizajimts nu Ingys Ābelis romana “Klūgu mūks” i vuorda skaidruojums varātu byut – cylvāki, kas ir jauni, glupi i panaivi. Serials “Fati” sajēme ari Latgalīšu kulturys goda bolvu “Boņuks 2022”.

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]