Kulturys īsacejumi nedeļai: īpazeit džezu, masku tradicejis i viesturis stygys Rēzeknē
![Kulturys īsacejumi nedeļai: īpazeit džezu, masku tradicejis i viesturis stygys Rēzeknē](https://www.lakuga.lv/wp-content/uploads/2024/02/Kolaza-3-bildes-paraugs-3-1000x667-c-default.jpg)
Rokstu sagataveja: portals lakuga.lv
Itūreiz ar kulturys īsacejumim nedeļai pasadola rodūša, talanteiga i muzykala personeiba – Mārcis Lipskis. Tai var raksturuot ari ituos nedelis nūtikšonys, kurys portala skaiteituojim īsoka jaunais muziks, muzykys pedagogs i dzīšmu autors – nasēdēt sātā, tok apmeklēt kulturys pasuokumus, kas sevkuru boguotynuos ar jaunom, vierteigom zynuošonam kai muzykys, tai viesturis i muokslys jūmā.
II Storptautyskais etnodžeza konkurss “Guoyu pa Jazz”
Ka caturtdīni gribi pavadeit cytaižuok, nakai īrosts, tod esi kluotasūšs i smelīs īdviesmi nu etnodžeza muzykys burveibys nu 14.00 da 17.00 stuņžu Latgolys viestnīceibā “Gors”. Originalmuzykys konkursā, kuru organizej Latgolys Muzykys i muokslys vydsškola, pīsadaleis ostoni Latvejis i Baļtejis muzykys vydsškolu ansambli. Pasuokumā dzierdēsit ospruoteigus entodžeza muzykys originaldorbus i aranžejis, kas nūteikti naatstuos vīnaldzeigus. Dalinīkus viertēs pīredziejuse žureja: Roberts Alans Makijs, Tuoms Rudzinskis, Katarīna Tirmaste i Ēriks Zeps. Tim, kas navarēs byut kluot, byus daīmama tīšraide školys YouTube i Facebook platformuos. Tok seikuoka informaceja daīmama ITE.
![](https://www.lakuga.lv/wp-content/uploads/2024/01/guoyu-pa-jazz-2023-2-620x440.jpg)
XXV Storptautyskais masku tradiceju festivals Viļānūs
9.-11. februarī Viļāni pi seve uzjims kruosainu i kecereigu masku festivalu, par kuru vītejī dzeivuotuoji “paliks iz pauzis” i ar daudzi vaicuojumim. Festivals nūtiks piļsātys īluos, lauku sātuos i kulturys nomā, pīduovojūt muokslinīcyski daudzveideigu i boguoteibu programu treju dīnu garumā. Piļsātā gasteis 20 dažaidys masku trupys nu Baļtejis vaļstu i Portugalis. Seikuoka informaceja ITE.
![](https://www.lakuga.lv/wp-content/uploads/2024/02/416409564_1056752778929052_5186866581262201403_n-620x465.jpg)
“Nezināmās Rēzeknes” lekcejis i puorguojīni
Kod ej pa Rēzeknis īlom i īraugi kaidu vacu, sorkonu ceglu sātu, tod zyni, ka “Nezināmās Rēzeknes” komanda eistyn zynuos, kas tei par sātu i kas tī nazkod ir bejs. Atraktivuo dūmubīdru grupa ar dagūšu interesi izzynoj vysa veida piļsātys viesturi i doluos ar puorejim, kuri atīt ar sovu čaju i maizeitem. “Nezināmā Rēzekne” regulari reikoj pietnīcyskus puorguojīņus, izzynūšys lekcejis i doluos ar sovim jaunuokajim atkluojumim Facebook. Viesture nav vīneigais, ar kū kusteiba nūsadorboj – jī doluos puordūmuos i piļsātā, īspiejams, pošim naapsazynojūt, veidoj inteligeņcis klubu. Itū sastdiņ lektoris gūdā byus Ilga Šuplinska, kura daleisīs ar sovom puordūmom Latgolys konceptu sacynuošonā i veiduošonā. Seikuoka informaceja ITE.
![](https://www.lakuga.lv/wp-content/uploads/2024/02/416599734_766482804989772_7002741122610263337_n-620x620.png)
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)