Folklorys kūpa “Upīte” martā pīduovoj dzīsmi disko skaņuos

Folklorys kūpa “Upīte” martā pīduovoj dzīsmi disko skaņuos

Rokstu sagataveja: portals lakuga.lv

Portals lakuga.lv jau viesteja, ka folklorys kūpa “Upīte” suokuse apzynuot, īraksteit i vuiceitīs Upītis kulturtelpā i tai pīguļūšajā teritorejā kolhoza laikūs dzīduotuos dzīsmis. Daļa nu salaseitūs dzīšmu teik atjaunuotys, dūdūt tom jaunu, myusdīneigu skaniejumu i kotru mienesi 21. datumā vīnu nu tūs publicejūt. Martā teik izdūta dzīsme “Ak, dzeive”, kas veļteita vīnai nu suopeiguokūs Latvejis tautys viesturis nūtikšonu – 1949. gods izsyuteišonai i leidz ar tū cylvāku sadzeišonai kolhozūs.

Tyvojās 25. marts, kod teik pīmynātys 1949. gods deportacejis, kuruos izsyuteja tyukstūšom navaineigu cylvāku, tai puorejūs pīspīžūt struoduot kolhozūs. Partū folklorys kūpa “Upīte” izalasejuse martā publicēt dzīsmi “Ak, dzeive”, kura viestej par nažieleigū dzeivi, kod Latvejis tautai ir salauzts tuos īrostais dzeivis veids. Originali itei dzīsme ir melanholiska i aizkustynojūša, tok folklorys kūpa “Upīte” tū aranžējuse 20. godu symta 80. godu disko skaņuos, kas pīškir dzīsmei sovaidu skaniejumu. Dzīsmei pīvīnuots reps, kura teksta autors ir Arnis Bukšs.

Folklorys kūpys vadeituojs i ari ituos dzīsmis video autors Andris Slišāns soka: “Dzīsmis video stuosts ir taiseits kai 20. godu symta 80. godu diskoballeite, kur muziks, kas uzastuoj tam laikam rakstureigajuos disko skaņuos, izpylda cīši nūpītnu dzīsmi ar dziļu dūmu. Jaunīši izaklaidej, nadūmojūt par sovu vacuoku i vacvacuoku liktinim, jo paguojs vaira nakai 30 godu nu suopeigūs nūtikšonu, puorsamejuse paaudze, kluotyn vēļ jūs vydā, prūtams, ir “cīma caca” – komjaunīšu vadeituoja, kura ir izteikta okupacejis varys slavynuotuoja. Tok itamā diseneitē īsarūn ari patriotiski nūskaņuots veirīts, kurs ir kai boltais zvierbuļs, sovys puorlīceibys deļ teik izsmīts, bet jam saīt paruodeit pareizū ceļu.”

Folklorys kūpa “Upīte” ir salasejuse vaira par 100 kolhoza laikūs dzīduotūs dzīšmu. Nu tūs īplānuots vysmoz 10 dzīsmis atjaunuot, dūdūt tom jaunu skaniejumu, bet vēļ vysmoz 30 dzīsmis kvalitativi īraksteit, lai tuos napagaistu, jo itūs dzīšmu zynuotuoji palīk vacuoki i dzīsmis dzīd rešuok. Īdzeivynuotys i atjaunuotys teik tuos dzīsmis, kuruos jiutama smeļdze par breiveibu, kuruos dzīd par mīlesteibu, attīceibom, sadzeivi i pat okupacejis laiku izsmejūšom temom.

21. novembrī tyka prezentāta pyrmuo dzīsme “Kara laukā”. 21. decembrī tika dāvināta klausītājiem jauna dziesma “Kod īt iz balli”. 21. janvarī tyka prezentāta dzīsme “Brigaders”. Februarī tyka duovuota Līvijis Supis teiktuo ukraiņu tautys dzīsme “Marička”. Martā teik duovuota dzīsme “Ak, dzeive”. Īroksts tyka veikts studejā “Bigmaar’s Records”, bet video verseju dzīsmei taiseja “Waltz Visuals” kūpā ar video režisorim Andri Slišānu i Kati Slišāni. Video akteri – folklorys kūpys “Upīte” daleibnīki i kūpys draugi. Folklorys kūpa soka paļdis par atbolstu Vaļsts kulturkapitala fondam.

Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Boltkrīvejā.


Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]