Rokstu sagataveja: portals lakuga.lv

Pīktdiņ, 5. julī, Rancāna pogolmā Rēzeknē nūtiks diskuseja, kas veļteita latgalīšu volūdai i bailei nu latgaliskuo vysaidūs aspektūs. Kai viestej pasuocīņa reikuotuoji, vokora laikā kotram interesentam byus vareiba vaira izzynuot ari par iniciativu “Bolsu tolka” i paraudzeit pošam īrunuot kaidu nu latgaliskūs teikumu.

Rancāna pogolms ir pārnejā vosorā Rēzeknē attaiseita kulturvīta, kurā, pīduovojūt piļsātys dzeivuotuojim i gostim regularus koncertus, diskusejis i cytys nūtikšonys, apsavīnuojuši kopeja konceptveikals “KUUP” i “Ausmeņa Kebabs”. 5. julī 18.00 stuņdēs, sasadorbojūt ar latgalīšu kulturys kusteibu “Volūda”, Rancāna pogolmā byus diskuseja, kas veļteita latgalīšu volūdai i bailei nu latgaliskuo. Diskusejā pīsadaleis “KUUP kopeja grauzdātovys” saiminīks Oskars Maculevičs, literate Ilze Sperga, muzike i vacuoku seminaru vadeituoja Guna Kise i geštaltterapeite Gunita Veismane, bet diskuseju vadeis kulturys montuojuma eksperte i pasuokumu moderatore Iveta Balčūne.

Latgalīšu kulturys kusteibys “Volūda” vadeituoja Edeite Laime stuosta, ka ideja par itaidu temu roduos piec sarunys ar KUUP saiminīku Oskaru, kurs izsaceja dūmu, ka šaļtim vaira grybātu dareit nazkū latgaliski, tok ir baist, ka nazkas byus napareizi. “Koč i par latgalīšim soka, ka asam sirsneigi, draudzeigi i izpaleidzeigi, vys tik, kod temats ir latgalīšu volūda, izaruoda, ka tik cīši “draudzeigi” naasam. Varbyut tū sajiutu roda socialūs teiklu burbuli ar vysaidom taisneibom i patīseibom, gribiešona aizsuorguot nazkū i nūruodeit iz klaidu byušonu, varbyut kas cyts. Ari situacejuos, kod vacuoki izalosa narunuot ar bārnim latgaliski, ir kluotyn nazkaids bailis faktors, ka latgaliskais nabyus bārnim tys lobuokais, deļtuo ari ruodejuos īdareigi itaidu tematu aktualizēt i raudzeit pošim pameklēt tuos bailis īmesli. Laikā, kod tehnologejis arviņ vaira suoc “runuot” latgaliski, bet statistikys dati ruoda, ka runuotuoju Latvejis dzeivuotuoju vydā palīk vys mozuok, byutu svareigi saprast, aiz kuo tei baile rūnās i ar laiku raudzeit padareit mozuoku,” soka E. Laime.

Diskusejis laikā i šaļti piec tuos byus vareiba vaira izzynuot ari par volūdys tehnologeju iniciativu “Bolsu tolka”, kai ari pošam paraudzeit īrunuot pyrmūs teikumus latgaliski. Par iniciativu vaira pastuosteis i īrunuošonā tehniski paleidzēs Rēzeknis Tehnologeju akademejis vodūšuo pietneica Antra Kļavinska.

Piec diskusejis Rancāna pogolms aicynoj riezeknīšus pīktdīnis vokoru turpynuot ar grupys “Oranžās brīvdienas” koncertu.